Komeleya Ciwanên Welatparêz ên Kurdistanê û Tevgera Jinên Ciwan ên Têkoşer, li dijî êrîşên dagirkeriyê yên dewleta tirk dê îro li Qendîlê çalakiya ‘Mertalên Zindî’ bidan destpêkirin.
Ji bo vê yekê komên ciwanan ji serê sibehê ve berê xwe dan Qendîlê. Her wiha gelek welatî jî bi armanca destekdayînê derketin rê. Lê li seytereya dawî ya li bajaroka Sengeser hatin astengkirin. Tevî hemû hewldanan jî, rêya ciwanan nehat vekirin.
Li ser astengkirinê ciwanan xwestin ku bi meşê biçin Qendîlê lê hêzên asayîşê mudaxele kirin û nehiştin biçin.
Di dema mudaxeleyê de ciwanek bi sivikî birîndar bû. Her wiha rojnamegerên ku dixwestin bûyeran bişopînin jî, hatin astengkirin û derbkirin.
Komek endamên Şandeya Aştiyê ku ji Ewropayê hatibû û li Başûr hevdîtinan dike jî, xwest piştgiriyê bide çalakiyê lê destûra derbasbûna wan jî nehat dayîn.
Li ser astengkirinê, girse li seytereyê kom bû û çav li rê ye ku di kêliyên pêş de daxuyaniyekê bidin çapemeniyê. RANYA
