Hemsereka Pêroyî ya Partîya Demokratîke ya Şaran (HDP) Pervîn Buldane Meclîs de kombîyayîşê partîya xo de qisey kerd û babetanê ke rojeve de yî ercnaye. Kombîyayîş de fotografê Denîz Poyraza ke bînaya HDPyî ya Îzmîrî de hetê nijadperesto perwerdekerde ra ameybî qetilkerdene dîya maseyan sero û seba Poyraze deqeyêk rêz ame girewtene. Buldane dima ra dest bi qiseykerdişê xo kerd.
Buldane qiseykerdişê kombîyayîşê partîya xo de vat: ”Ma zaf xemgîn ê. Embaza ma, kedkara ma Denîz Poyraze kişîyaye. Înan tarîxê xo de rîpelê tarî zêdînayî. Înan hêvîya haştîye kişte. Înan da xeyalê ameyoxî yê şaran ro. Înan îradeyê ma kerd hedef. Pê qirkerdiş, cînayetanê sîyasîyan, zulm û îşkenceyî û pê çeteyan ê wazenê nê erdî mîyanê tarîtîye de verdê. La do qetî ser nêkewê.
Ê do nêeşkê ma têkoşînê cuye ra dûrî bivisnê. Tarîxê têkoşînê ma, tarîxê xoverdayîşê rûmetênî yo. Rayîrê ma haştîye û azadî yo. Nameyê ma Denîz a ke çemê xoverdayîşî tede benê yew. Nameyê ma Denîz Poyraze ya. Xeyalê to yo nêmcet xeyalê merdiman o. Ma soz danê to ke haştîye do bîyarê nê welatî.
Tetîkkeş têna nêbi. Tay kesan o rêxistin kerd û rayîr mojna ci. profîlê kiştoxî rîyê hemparî mojneno. No rî nefretê vera nasname, kultur, bawerîye û haştîye yo. No dişmenîya vera kurdan a. No ziwanê gefî yo ke Rojawan de DAIŞ o, Tirkîya de Susurluk o, mafta û çete yo. Qirkerdişê Denîz Poyraze plano rêxistinkerde yo. Ê pêro pîya yê. Qirkerdişê Îzmîrî de herinda tîlîlîyan de her çi esto. Qirkerdişê Îzmîrî de serê sûcî ame girewtene.” ANQARA
