Di 10’ê hezîranê de nûnerê pêwendiyan ê PYD’ê yê Hewlêrê Mistefa Osman Xelîl, nûnerê Rêveberiya Xweser ê Hewlêrê Cîhad Hesen û Endamê PYD yê Hewlêrê Mistefa Ezîz Mistê dema saet di 03.00’an de diçûn pêşwaziya mêvanên xwe, li balafirgeha Hewlêrê ji aliyê hêzên PDK`ê ve hatibûn girtin.
Tevî ku di ser binçavkirinê re 21 roj derbas bûn jî hîn agahiyek ji her sê kesan nayê girtin û têkildarî mijarê tu zanyarî ji bo PYD û Rêveberiya Xweser nehatine dayîn.
Meclisa Giştî a Partiya Yekitiya Demokratîk (PYD) derbarê nûnerên Rêveberiya Xweser û PYD’ê ku li Başûr ji aliyê PDK’ê ve hatin revandin daxuyaniyek da.
Di daxuyaniyê de wiha hat gotin:
“Di demeke ku ji me hemûyan pêkanîna yekitî û hevgirtinê, giyana berpirsyariya exlaqî û dûrketina ji nakokiyan û xebata li dijî hewldanên dewleta tirk ên dagirkirinê, tê xwestin de, desthilatên Hewlêrê di 10’ê hezîranê de endam û nûnerên Rêveberiya Xweser û Partiya Yekitiya Demokratîk (PYD) ên li başûrê Kurdistanê, Cîhad Hesen, Mistefa Osman Xelîl û Mistefa Ezîz Mistê dema diçûn balafirgeha Hewlêrê da ku mêvanên xwe yên rojavayî pêşwazî bikin, girtin. Ji wê demê ve em desthilatên Başûr muxateb digirin û jê dixwazin ku aqûbeta hevalên me û sedemên girtina wan ku ji pîvanên dîplomasiyê dûr in, diyar bikin. Lê ev bangewaziyên me heta niha bê bersiv in.
Em weke Meclisa Giştî ya PYD’ê ji her zirar û xetereyeke ku were serê hevalên me û ewlehiya wan desthilata Başûr, berpirsyar dibînin û daxwaza me ya zelalkirina aqûbeta nûnerên partiya me li Başûr berdewam e.
Em li hemberî raya giştî bang li desthilatên başûrê Kurdistanê dikin ku yekser aqûbeta hevalên me aşkera bike û wan serbest berde.
Em bi baldarî rewşa wan dişopînin bi taybet digel ku agahî hene ku ew radestî hinek aliyên ku dijminatiya kurdan dikin, hatine kirin.
Em vê pêngava girtinê û aqûbeta hevalên xwe wek hedefgirtineke rasterast a li dijî partî, destkeftî û hewldanên me yên ji bo pêkanîna yekitiyê dibînin.
Ji nirxandina hûrgilî ya kiryarên desthilatên Hewlêrê diyar dibe ku ew pêkanîna hewldanên dewleta tirk û pergalên dagirker ên li dijî doza me û armancên wê hêsan dike.” QAMIŞLO
