Mehmet emîn Ozkano 83 serre 1993 de qezaya Licê ya Amedî de bi îdîaya ke Fermandarê Herêma Cendirmeyan Bahtîyar Aydin kişto cezaya muebede dîyaye ci. Rixmo ke eşkera bi têkilîya ci pê nê serebûtî çin o Ozkan 25 serre yo tepişte yo.
Ozkano ke Zîndanê Tîpê Dyî yê Amedî de yo û ‘Apê Dedo’yê embazanê xo yo. Ozkan nêweşo giran o û 2 menganê peyênan de 7 reyî wedarîya nêweşxane. Dîmenê ke o bi hawayêkê kelemçekerdeyî, kişta ci de polîsî wedarîya nêweşxane rayaumûmîye de bi sebebê nêrazîbîyayîşî. Nê dîmenan ra dima Apê Dedo reyna wedarîya nêweşxane û seba sewqê nêweşxaneyê Xarpêtî raporê weşîye ame waştene. La reyna ame berdene bi Amed.
Dewleta tirke kişîyayîşê Bahtîyar Aydinî kerdbi bahane Licê vêşnabi û dewî kerdbi veng. Keyeyê Dedoyî zî bi zorî ame surgunkerdene. Keyeyê Apê Dedoyî verî koçê Adana dima zî koçê Mersînî kerd. Adana de kênaya înan Servete tewrê gerîlayan bîye û nameyê xo kerd ‘Bêrîtane.’
Apê Dedo Mersîn de 1996 de tepişîyeno û ci rê cezaya îdamî dîyena. Dima ke cezaya îdamî wedarîyena cezaya ci vurîyena muebede. Serranê 2000an de leşkeran îtîraf kerd ke Bahtîyar Aydin zî tede xeylêk hêzê dewlete hetê dewleta xorine ra kişîyayî û eşkera kerd ke yew eleqeyê Dedoyî pê kişîyayîşê Aydinî çin o.
Îtîrafê leşkeran ra dima 2014 de dosyaya Apê Dedoyî reyna yena ercnayene. 7 serran dewa dewam kerde la tira netîceyêke nêvejîyaye. Mehkemeya tirkan dosyaya Apê Dedeoyî pê dewaya vêşnayîşê Licê girê dana û nêverdena Dedo bêro veradayene.
Nevzat Ozkano ke wextêk babîyê xo reyde zîndan de mendo vat: ”Dewlete sena ke bi fermî kişîyayîşê Bahtîyar Aydinî mîyan bikera nêwazena babîyê mi vera bida”
Dewleta tirke keyeyê Ozkanî ra 4 kesî tepiştî. Hema zî Apê Dedo û lajêkê ci zîndan de yê. Lajê ci yo bîn zî pê kelemçeya elektronîke keye de heps o. Nevzat vano: ”Ma hîrê birayî sey babîyê xo tepişîyayî.”
Apê Dedo nêweş o, 4-5 serranê peyênan de nêweşîyê ci zêdîyayî, ey çend reyî krîzê qelbî derbaz kerdî û anjîyo bîyo. Bi desan nêweşîyê ci yê kronîkî estê la Apê Dedo rixmê nînan zî xo ver dano. Nevzat vano: ”Wexto ke ma qij bîyî o tepişîya û hema zî hêvîdar o. Hêvî û bawerîya ey a bi têkoşînê şarê kurdî qetî nêqedîyaye.” Çime: Anf
