Navenda Nûçeyan |
Fermandarê Giştî yê Hêzên Sûriyeya Demokratîk (HSD) Mazlûm Ebdî li ser hesabê xwe yê twitterê têkildarî îdîayên dewleta tirk ên wekî ‘li Efrînê gorek komî hatiye vekirin’ wêne û dîmenên ku vê yekê di derewîne û sûceke din a şer a dewleta tirk radixe berçavan belav kir.
Mazlûm Ebdî diyar kir hêzên dagirker ên dewleta tirk ên li Efrînê gorên şehîdên ku di dema şer de li nava taxan de hatine veşartine vedikin û ji bo li ser vê sûcê xwe yê dijî mirovahiyê bigirin jî rastiyê berovajî dikin û dibêjin, ‘gorek komî’ dîtine.
Ebdî her wiha da zanîn dewleta tirk bi vekirina gorên şehîdan sûcê şer û sûcê li dijî mirovahiyê dike û bang li saziyên navneteweyî kir ku li dijî van sûcên şer ên dewleta tirk bikevin nav tevgerê û pêşî lê bigirin.
Mazlum Ebdî di heman twittê de wêne û dîmenê nû û kevin ên gorên şehîdan belav kir û di wêne û dîmenên ku hatiye parvekirin de jî îdîayên dewleta tirk bi temamî pûç dibe.
Di wêneyên ku di dezgehên din ên ragihandinê de hatine belavkirin de jî diyar dibe ku cenazeyên ku hatine derxistin, ne di gora komî de bûne, hemû kefenkiri ango pêçayîne.
