Fermandarîya Pêroyî ya Yewîya Pawitişê Cinîyan (YPJ) bi wesîleya serrgêra 9. ya Şorişê Rojawanî ya 19ê Temmuze eşkerayîye daye. Goreyê xebera ANFyî YPJyî verî serrgêra 9. ya Şorişê Rojawanî fîraz kerde, şehîdî yad kerdî û soz da ke ê do qesasê şehîdan bigêrê.
Eşkerayîye wina dewam kena:
Serra 2011î de xeylêk welatanê ereban de şarî sere wedarna. Kurdan zî nê prosesî de rêxistinîya xo aver berde û 19ê Temmuza 2012î de sere de Kobanê de pêro Rojawan de bingeyê sîstemê demokratîkî eştî. Şorişê Rojawanî keda 20 serran a Rayber Apoyî ya. Şorişê Rojawanî bi hêvîya şaranê bindestan. Nê şorişî verî ciwan û cinîyan ê kurdan rê tesîr kerd. Şarî pê îradeyê xo, pê paradîgmaya azadîwaştoxê cinîyan, demokratîke û ekolojîke derbazê sîstemê konfederaslîzmê demokratîkî bi û îdareyê xo aferna. Cinîyan ê kurdan rayberîya şorişî kerde û her cayê dinya ra merdimî tewrê Şorişê Rojawanî bîyî. Îdareyo Xoser seba şaranê herême bi modelêko newe yê cuye. Coka şinasnayîşê statuyê Îdareyê Xoserî şinasnayîşê îradeyê şaran o. Wayîrvejîyayîşê nê modelî wezîfeyo bingeyî yê têgêrayîşanê şaran o.
Dewleta tirke destpêkî ra nata pê cerganê xo hêrişê şorişî kerd û peynî de pê bahaneya ‘pawitişê sînoranê xo’ Rojawan îşxal kerd. Nê îşxalî de bi hezaran merdimî hetê dewleta tirke ra ameyî qetilkerdene. Ewro zî Efrîn de cinîyî maruzê hêrişê cînsî benê, sivîlî yenê remnayene, doman û kokimî kişîyenê û dewleta tirke cerganê xo reyde Rojawan de pêro sûcanê vera merdimîye kena.
Tirkîya demografîya Efrînî vurnena, Serêkanîyê de binê nameyê perwerdeyî de çekan dana domanan. Dinya nê kerdişan çin hesibnena. Neteweyê Yewbîyayeyî û Yewîya Ewropa semedo ke statuyê Rojawanî nêşinasnenê hêrişanê dewleta tirke kenê meşrû.
Sey YPJyî ma sozê xo dibare kenê ke heta peynî Şorişê Rojawnaî bipawê, pîl bikerê. Vera hêrişanê îşxalî ma do şarê xo bipawê, mesuldarîyanê xo bîyarê ca, wayîrê nê mîrasî vejîyê. Şarê kurdî reyde pêro şarî bindest ê. Serrgêra 9. de ma soz danê ke Efrîn, Serêkanîyê û Girê Sipî azad bikerê, hewn û xeyalanê nêmcetan ê şarê xo bîyarê ca, îşxalkeran erdê xo ra vejê û cewab bidê waştişanê şarê xo.”
