Komkujiya li Konyayê ku di encamê de 7 kurd ji heman malbatî ji aliyê nijadperestên tirk ve hatin qetilkirin, li Wargeha Penaberan a Şehîd Rustem Cûdî (Mexmûr) bi tundî hat şermezarkirin.
Destpêkê di kesayeta şehîdên Komkujiya Konyayê de, ji bo tevahî şehîdan deqeyek rêz hat girtin. Piştî rêz girtinê Hevserokê Meclisa Gel a Mexmûrê, Hecî Kaçan axivî.
Kaçan destpêkê sersaxî ji malbat û xizmên ku di qetlîama Konyayê de hatine qetilkirin re xwest û wiha got: “Qetilkirina wê malbata kurd, qetilkirina tevahî gelê kurd e. Bi hezaran malbat û welatparezên me bi vî şêwazî hatine qetilkirin. 12’ê Gulana îsal jî dîsa êrîşî wê malbata me kiribûn. Sedemê vê êrîşê jî kurdbûna wan bû. Duh jî dîsa rû bi rû êrîşa nijadperestî hatin û ji malbatê 7 kes bi awayek hovane hatin qetilkirin. Gelê wargehê ji wan komkujiya re ne biyanîn e, bi encama wê polîtîkaya ku bi milyonan kurd penaber bûne kes û karên me ji bi vî awayî hatin qetilkirin.
Dewleta tirk nikare li hemberî gerîla şer bike, tola xwe bi vî awayî radike û dixwaze êş li gel bide kişandin. Em xelkê wargehê vê qetlîamê şermezar dikin, em soz didin ku li hember nijadperest û tifaqên qirêj tu caran serî natewînin, em ê ber xwe bidin heta ku tola wan hildigirîn.
Em bang li hemû kesên xwedî wijdan dikin ku îro li hember vê komkujiyê rabin li ser pêyan. Eger îro hesap neyê pirsîn, dê li bajarên din jî heman komkujî pêk were. Em hêvîdar in ku di demek nêz de wê tola wan were hildan û xeyalên wan pêk bê.”
Daxuyanî bi dirûşmên ‘Şehîd Namirin’, ‘Bimre tifaqa AKP û MHP’ê’ dawî bû. MEXMÛR
