Welatijê dewa Rizî ya qezaya Darahînî ya Çewlîgî de bi ramitişî û pesdewarî dir eleqedar benê û pê debara xo kenê. Saadet Akgok û Metiye Aydemîr na dewe de ciwîyenê, ajansê ma rê qalê kar û barê xo yê rojane kerdî.
Saadete, 25 serrî yo bi ramitişî dir debara xo kena wina qal kerd: “Dewa ma hem hetê xoza ra û hem zî hetê ramitişî dir cayêk dewlemend a. Ma bi wisarî dir dest bi ramitişî kenê, heta destpêkê demsalî de ma nê karî dir eleqedar benê. Çiqas qîmê ma nêkero zî ma ci ra feyde gênê. Xeylêk roniştoxê na dewe zî seba berardişanê xo yenê. Tewr zêde zî cinî nê karî dir eleqedar benê. Ma her serre bi kedêke pîl nê bax û baxçeyan dir eleqedar benê.”
‘Emsar ziwatî tesîr bî’
Saadete wina vat: “Ziwatî emsar tewr zêde herême de bi tesîr bî. Hîn berardişê ma wişk bî û sey serrê vîyarte de zêde nêgirwtî. Germbîyayîşê emsar de ma xeylêk zehmet dî. Bi taybetî emsar komkerdişê sebze û fêkîyan zehmet bi. Sewbîna tîya de xeylêk keyeyî pêwa ramitişî bi pesdewarî yan zî hingdarî debara xo kenê.”
‘Herra ma bi bereket a’
Metiye ke mîyanê baxçeyê xo de fasuliyê xo kom kerdêne wina vat: “Ma her tewir sebzeyan ramênenê. Sey; firîngî, îsot, xiyar, fasuliye, balîcan û xeylêk sebzeyê bînî dewe ma de resenê. Herre dewe ma bi ramitişî dir bi bereket a. Ma hem bi nê sebzeyan debara xo kenê. Sewbîna ma bi nê sebzeyan zî seba zimistanî amadekarî kenê.”
‘Karê ma xeylêk zêde û zehmet o’
Metiye, wina qedêna: “Karê dewe xeylêk zêde û bi zehmet o. Bi karê wina dir tewr zêde cinî eleqedar a. Sewbîna mêrdeyê mi zî hingdarî dir û ez zî bax û baxçeyî dir eleqedar bena.” ÇEWLÎG
