Îdareyê Xoserî yê Şingalî derheqê xîretê PDKyî de ke wazeno reyna Şingalî îşxal bikera veng da. Îdareyê Xoserî pê eşkerayîyêke pare kerd ke PDK peyê provokasyonanê neweyan de yo û wazeno gonîya êzidîyan birijno.
Eşkerayîye de ame vîrvistene ke PDKyî 3ê tebaxa 2014î de wextê qirkerdişê DAIŞî de şarî rê îxanet kerd û rema. Îdareyê Xoserî îfade kerd ke 2ê teşrîna verêne de înan erdê xo verê PDKyî pawit ke PDK wazeno gonîya êzidîyan birijno.
Îdareyê Xoserî pare kerd ke PDK xo rê weçînayîşî keno mana û o wazena peymana 9ê teşrîna verêne bîyaro ca, Leqa 17 Şingal de abikero û Şingal de ca bibo. Îdareyê Xoserî îfade kerd ke êzidîyî sey verî nîyê û wayîrê îradeyî yê.
Îdareyê Xoserî vat: ”Ma terefgîrê şerî nîyê. Ma wazenê weçînayîşî bi hawayêkê demokratîk û azadî bêrê kerdene. Ma do sindoqan de îradeyê şarê êzidîyî ser bivisno. Wa her kes bizano ke eke vera şarê ma hêrişêk bêro kerdene ma do cewabê nê hêrişî bidê û ma do xo bipawê. Ma venga komelê êzidîyan danê ke wayîrê Şingalî vejîyo û paştî bido xoverdayîşê êzidîyanê Şingalî. Ma venga hêz û rêxistinanê Kurdîstanî danê ke senî ke fermanê 2014î de PKKyî xo resna hewarê êzidîyan wa reyna wayîrê îradeyê azadî yê Şingalî vejîyê û paştî bidê ci.” ŞINGAL
