10ê Teşrîna Verêne 2015 de tarîxê Tirkîya de qirkerdişêk bîn zî ame ciwîyayîş. Nê 6 serrî de ne qirkerdiş ame xovîrrakerdiş, ne zî dejî ameyî dermankerdiş. Şahida
qirkerdişî Edge Tetîk ke qirkerdiş de birayê xo Korkmaz Tetîk vînî kerd, dîyar kerd ke 10ê Teşrîna Verêne mîlad o. Bi wesîleyê 6in serrgera qirkerdişî de Edge Tetîk ma keyeyê xo de kerd mêman û derheqê qirkerdişê 10ê Teşrîna Verêne de fikrê xo qal kerd.
‘Çar het ra qirkerdişê aştîye’
Edge ke dest bi qiseykerdişê xo kerd, kelecanê a roje ciwîyayîne, çimê aye de asayîne û vatêne, keye o meydanî de do biameyîne têhet. Edge dîyar kerd Korkmaz zî Denîzlî ra semedê mîtîngî amebi û wina vat: “Coşê a roje xeylêk pîl bi. Merdim semedo ke aştî qîr bikerê her çar hetê welatî ra amebî.”
‘Rayîrî veng bî’
Edge vat, roja ke qirkerdiş ameyo kerdiş rayîrî veng bîyê û şaş mendê û wina dewam kerd: “Verê semedo ke rayîrê verênî kanî bî, ma mecbûr mendêne rayîrê bînî ra şêrê. Keyeyê ma ra heta Gar 15 deqeyê ma girewt. Ma zaf lez resayî ware û ez şaş menda.”
‘Her çî weş bî’
Edge derheqê coşê meydanî zî ard ziwan û vat, coşêk pîl meydan de bîyo, her ca de merdimî bîyê, her çî zaf weş bîyo û vat: “Semedê aştîye hende merdimî amebî têhet. Bawerî o bi ke do welat de hawayêk cîya awan bikero.”
‘Gonî û parçeyê goştî serê ma de mendibî’
Edge wina dewam kerd: “Korkmaz semedê deqeyêk verê ma ra şi. Reyke de vengê teqayîşî ame. Merdimî remayî. Dimayê teqayîşî ma remayî gar. Dima ra berê garî padayî. O wext her kes yewbînan rê hetkarî kerdêne. Ma keyeyî yewbînan dî la ma Korkmaz nêdî. Serê ma de gonî û parçeyê goştî vila bibî. Ma ferq kerd ke serebût pîl o. Ma hewl da ma Korkmaz bivînê la ma nêdî. Pîyê mi ma bi hawayêke Gar ra vet. Dima ra boya gazî ameye.”
‘Ma ver bi nêweşxane rayrayîş kerd’
Edge dîyar kerd ke senîn xebere Korkmazî ra girewtê, şîyê nêweşxane û vat: “Trafîk xetimya bi. Vatî şima bi rayrayîş eşkenê lez biresê nêweşxane. Ma bi komêk merdiman dir ver bi nêweşxane şî. Korkmazî rew berdibî nêweşxane. Embazanê Korkmazî vat, rewşa ey baş a la xeylêk merdiman rê gonî lazim a. Ma şî nêweşxaneyê Îbn-î Sîna ma gonî da. Ma vatêne Korkmaz baş o wa feydeyê ma bireso yê bînan. Wexto ke ma dore gonî de bî, xebere ameye û vatî, Korkmaz beşê giran de yo. Ma şî verê Nêweşxaneyê Numune. Uca sey mahşerî bi. Zere de koasêk estbi. Polîsan vato, ‘xebera merdişê Korkmazî medê ke wa tebera şar nêwurzo serê lingan.’ Vernê de vatî ‘merdo’ dima ra vatî, ciwîyeno. Ma di rey travma ciwîyayî. Doktorî binê kontrolê polîsan de bî. Vatêne mevajê. Dima ra ma xebera mergî girewt.”
‘Sey vizêrî yeno vîrê mi’
Edge dewam de dîyar kerd ke serebût sey vizêrî yeno vîrê ci û vat: “Heme çî sey vizêrî ameyo ciwîyayîş. Mi rê wina yeno. Qirkerdiş nîno xovîrrakerdiş. Ambulans nêkewtîne nêweşxane. Korkmazî bi wesayîtê sîstemê vengî berdê nêweşxane. No dejêko giran o. Qebûlkerdişê na rewşe zaf zehmet o. No qirkerdişêk tewr bi gonî yê tarîxî yo. 103 kesî bi bombeyan yenê qetilkerdiş. Tu kesî texmîn nêkerdêne ke no mîtîng do bi gonî derbaz bo. 10ê Teşrîna Verêne cuya ma vurna. 10ê Teşrîna Verêne mîladê welatî yo.”
‘Prosesê dadgehe semedê ma demê têkoşînî bi’
Edge dewam de wina vat: “Prosesê dadgehe semedê ma demê têkoşînî bi. Heta o wext ma her wext dej ant. Wexto ke dadgehe dest pêkerd ma vat ke dem demê dîyayîşê kiştoxan o. Ma do bêrê rî bi rî. Ma nê travma zî bi mengan ciwîyayî. Prosesê dadgehe de semedê kesê ke ameyîne muhakemekerdiş, cezayê cidî ameyî dayîş. Semedê kesê ke sûcê merdimayî kerdê ceza ameye dayîş. Tarîxê Tirkîya de reya ewil çîyêk wina bi. Ma zanê ke kiştoxê rast nê nîyê. Ê pêro pîyon bî û yê ke rayîr da nê pîyonan estibî. Demo ke ma şînê xo girewtêne, pawitişê kiştoxan dejê ma tewr giran kerd. Her reya ke ma şîne salona dadgehe, ma heyetêke ke sey gumanbar mexdur ê û ameyîne pawitiş, dîne. Semedê nê hêrs û dejê ma tewr giran bîne.
‘Tu çîyêk sey vernîya 10ê Teşrîna Verêne nîyo’
Edge tewr peyîn wina vat: “Tu çîyêk sey verê nîyo. Cuya ma sey vernîya 10ê Teşrîna Verêne nîya. Muhakemekerdişê kiştoxan deynêke yo. Ganî heme kesê ke engişta înan nê qirkerdişî de esta, bêrê muhakemekerdiş. Ê merdimî semedê aştî uca de bî. Tu kes nêeşkeno 10ê teşrîna verêne xo vîr ra bikero. Xora wa xo vîr ra nêkerê. Ma deyndarê ê merdiman ê. Ganî 10ê Teşrîna Verêne ma nê wareyî pirr bikerê. Ganî dimayê 6 serran o meydan pirr bo.” ANQARA
