Jinên ku li dijî feraseta rêveberiya heyî ya li Tirkiyeyê, zêdebûna êrîş, kuştin, axaftinên nîjadperest û zayendperest dengê xwe bilind dikin, li Amedê kom bûn. Mîtînga jinan a ji aliyê Tevgera Jinên Azad (TJA) û Partiya Herêmên Demokratîk (DBP) ve bi şîara ‘Ji nîjadperestî û zayendperestiyê re êdî bes e, niha dem dema azadiya jinan e’ hat organîzekirin, li Qada Îstasyonê dest pê kir.
Hevseroka DBP’ê Salîha Aydenîz, rêveberên Kongreya Civaka Demokratîk (KCD), parlamenterên HDP’ê Nûran Îmîr, Semra Guzel, Remziye Tosûn û Ayşe Surucu, Dayikên Aştiyê, aktivîstên TJA’yê, rêveber û endamên Komeleya Hiqûqnasên Ji Bo Azadiyê (OHD) û gelek jin beşdarî mîtîngê bûn.
Jinên ku ji bajarên cuda hatin, piştî bergirtiyên zêde yên polîsan ji 3 aliyan ve ketin qada mîtîngê. Jinên ku kincên gelêrî li xwe kirin, bi rengên cur be cur qad xemilandin. Hatina jinan a ber bi qada mîtîngê ve dewam dike. Dengên tilîlî û berzkirina dirûşmeya ji qadê bilind dibe. AMED
