Navenda Nûçeyan |
Çalakiya konvedanê ya li ber deriye Sêmalkayê ya ji aliyê Meclisa Malbatên Şehîdan a Herêma Cizîrê ve ji bo radestkirina cenazeyên gerîlayên ku di kemîna hêzên PDK’ê de li Xelîfanê şehîd bûn û şermezarkirina kiryarên PDK’ê hatiye destpêkirin, di roja 13’emîn de didome.
Ji bo piştgirîdayîna çalakvanan şêniyên kantona Hesekê û Yekitiya Odeya Bazirganiyê û Yekitiya Esnafan a Bakur û Rojhilatê Sûriyeyê berê xwe dan konê xwepêşandanê.
Xwepêşandêr li qada dergehê Sêmalka kom bûn da ku berê xwe bidin deriyê dergehê Sêmalka û li wir daxuyaniyekê bidin.
Daxuyanî ji aliyê hevseroka Yekitiya Esnafan a Bakur û Rojhilatê Sûriyeyê Leyla Îbrahîm ve hat xwendin.
Di daxuyaniyê de hat diyarkirin ku hêzên gerîla 40 sal in li ber xwe didin û hemû tiştên giranbiha di oxira parastina rûmeta gelê kurd de didin.
Di daxuyaniyê de hat teqezkirin ku bûyera li Xelîfanê, qedeke reş e li eniya PDK’ê û wiha hat gotin: “Hedefgirtina gerîla vê dawiyê ji aliyê PDK’ê ve û şehîdxistina 5 keç û xortên kurd û dîlgirtina gerîlayekî, qedeke reş e.”
Her wiha hat gotin ku ew bûyer ji bo razîkirina dewleta tirk e ku di dema referandûmê de PDK’ê biçûk xistibû û gefa rûxandina wê xwaribû.
Xwepêşandêran di daxuyaniya xwe de teqez kirin ku neradestkirina cenazeyên herdu gerîlayan, hemû bangawaziyên hêzên nîştimanî derb dike û wiha lê zêde kirin: “Hedefgirtina gerîla û neradestkirina cenazeyên gerîlayên şehîd ji aliyê PDK’ê ve, hemû bangawaziyên hêzên nîştimanî û bangawaziyên beşên din ên gelê me binpê dike û hemû nirxên pîroz ên gelê me binpê dike. Ev kiryar tenê dikevin xizmeta dijminên gelê kurd.”
Her wiha kiryarên PDK’ê yên li dijî rêgez û peymanên mafên mirovan hatin şermezarkirin û wiha hat gotin: “PDK îxanet li kurdistaniyan û têkoşîna wan a dîrokî kir û projeya wan a kurdistanî derb kir.”
Di dawiya daxuyaniyê de bang li PDK’ê hat kirin ku rêzê ji gerîlayên şehîd re bigire û cenazeyên wan radestî malbatên wan bike, her wiha dûrî planên dewleta tirk ên li dijî kurdistaniyan bikeve.
