20’ê Cotmehê 111 parlamenterên Parlamentoya Katalonyayê bi awayeke fermî Statûya Xweser a Bakur û Rojhilatê Sûriyeyê nas kir. Biryara Parlamentoya Katalonyayê ji aliyê kurdan ve û bi taybet jî li başûrê Kurdistanê bi kêfxweşî hat pêşwazîkirin.
Çalakvan Silêman Wertî yê ji navçeya Ranya ya ser bi parêzgeha Silêmaniyê kêfxweşiya xwe ya ji biryarê anî ziman û ji kurdên derveyî welat xwest ku xebatên ji bo nasandina statûya Rêveberiya Bakur û Rojhilatê Sûriyeyê zêde bikin, da ku ji aliyê welatên din ve jî bi awayeke fermî were qebûlkirin.
Wertî biryara Katalonyayê weke biryareke werçerxane ya mezin bi nav kir û wiha got: “Ez bawer dikim ku wê Yekitiya Ewropayê û welatên din jî xwerêveberiya demokratîk nas bikin. Ji ber xwerêveberiya demokratîk a Rojava, di aliyê siyasî, leşkerî, demokrasî, îdarî ve gelek gavên mezin avêtiye.”
Wertî da zanîn ku diviyabû Rêveberiya Başûrê Kurdistanê jî bi rêyên dîplomatîk, xebat ji bo nasandina xwerêveberiya rojavayê Kurdistanê meşandiba.
Ji bo nasandinê xebat divê
Li gorî çalakvan Elî Dînke jî naskirina statûya rojavayê Kurdistanê dê êrîş û tehdîtên li ser Rojava ber alî bike û wiha axivî: “Rojava xwedî gelek ezmûnane. Ew di mijara demokrasî û bihevre jiyankirina gelan de serkeftîbûn. Ji ber vê divê were naskirin.”
Dînke ji bo naskirina statûya xwerêveberiya Bakur û Rojhilatê Sûriyeyê ji tevahî kurdan xwest pêngavek li her derê bidin destpêkirin û ev tişt anî ziman: “Divê gelê kurd li çar parçeyên Kurdsistanê û derveyî welat dakevin kolanan û ji bo statûya Rojava were naskirin xwepêşandan bikin. Pêwîst e kurd vê ya weke erkeke nîştîmanî û exlaqî bizanin. Her wiha divê li welat û derveyî welat qenalên dîplomatîk ji bo naskirina satûya Rojava bikar bînin.” RAPERÎN
