Hemvervatoxê Têkilîyanê Teberî yê Partîya Demokratîke ya Şaran (HDP) Hişyar Ozsoyî Meclîs de tezkereyê Lubnanî ser o qisey kerd.
Ozsoyî verî bale ant krîzê sersefîran ser û vat: ”Tirkîya endama Konseya Ewropa ya. Mehkemeya Heqanê Merdiman a Ewropa bire daye ke Selahattîn Demîrtaş û Osman Kavala wa bêrê veradayene. Sersefîran zî na bire viste vîrî. Krîz peynî de ame çareserkerdene. 30ê teşrîna peyêne de Komîteya Wezîran a Konseya Ewropa do bêra pêser û biranê hîna krîtîkan bigêra. Beno ke Tirkîya Konseya Ewropa ra bêra eştene. Ganî hukmat gamanê xo hol bierza. Polîtîkayê hukmatî zerar danê şarî.”
Ozsoyî dina tabloyêk mojna û îfade kerd ke goreyê nê tabloyî Sûrîya ra vera Tirkîya 22 hêrişî ameyî kerdene û vat: ”Nînan ra 12 tenî HSDyî kerdo la nê 12 hebî zî ‘hêrişê cewabdayîşî yê.’ Çeleyê 2017î ra heta tebaa 2020î hetê Tirkîya ra hêzanê ke Tirkîya paştî daya ci vera Sûrîye 3 hezar 400 hêrişî kerdî. Şima (hukmat) vanê semedo ke hînî multecî nêro ma wina kenê la şerî reyde hîna zêde multecîyî do bêrê. Dinya de Tirkîya ra ber çew nêwazeno ke krîzê Sûrîye giranêr bo
Tirkîya vana ‘yewparetîya erdê Iraq û Sûrîye.’ La qestê ci ‘ez hêrişê destkewteyanê kurdan kena.’ Hukmat pê nê kerdişan wina mesaj dano ke o hînî meseleya kurdan sey meseleyê asayîşî vîneno. La nê kerdişê înan welatî rê fayde nêkenê.”
Qiseykerdişan ra dima tezkereyê Lubnanî ame qebulkerdene. ANQARA
