Şaredarîya Dêrsimî bire daye ke dewa Tullukî de tesîsê eşteyan viraza. Semedê projeyê tesîsî raporê ÇEDî zî ame girewtene. La muxtaranê dewanê Tulluk, Verekaj, Axdat, Şagşek, Çinarli û Suvatî muracatê Mehkemeya Aslî ya Dêrsimî kerd û vera projeyî vejîyayî. Dewaya dewijan hema zî dewam kenê.
Dewijan derheqê babete de Ajansê Mezopotamya rê qisey kerd û vera projeyî nêrazîbîyayîşê xo mojna.
Dewija Tullukî Besere Kurbak ard ziwan ke tesîsî ra dima herême de do gandarî bimirê û vat: ”Têna dewa ma ney zerar do bireso dewanê bînan zî. No tesîs do jehr vila bikero, zerar bido merdiman, heywanan û xoza. Ma nê tesîsî nêwazenê.”
Emîne Kurbak îfade kerd ke tesîs do heywankarîye biqedîno û vat: ”Merdimî do pê nêweş bikewê. Ma nê tesîsî tîya de nêwazenê.”
Avûkata dewijan Ozgur Ulaş Kaplanî da zaneyene ke proje projeyêko faydeyîn o la herinda ci raşt nîyo. Kaplanî vat: ”Cayê projeyî warê daristanan o, nêzdîyê keyeyan, îbadetxaneyan û goristanî yo. Eke tîya de tesîs bêro viraştene bi des hezaran darî do bêrê birnayene. Xoza do texrîb biba. Boya tesîsî pê tesîrê vayî do vila biba. Tîya warê habîtatî yo û tede heywanê ke yenê pawitene estê. Şaristan de hende erdo ziwa esto la proje tîya de yeno caardene.
Şar heqê xo yê demokratîkî mojneno û projeyî nêwazeno. Xora do heyetê keşfî bêrê û cigêrayîşan bikerê. Dima mehkeme do bire bida. Ma verî xîret kerd ke pê dîyalogan mesele çareser bikera la şaredarîye apey gamêke nêeşte û goş nêda nêrazîbîyayîşanê şarî.” DÊRSIM
