Zarokê kurd Ûgûr Kaymaz û bavê wî Ahmet Kaymaz di 21’ê Mijdara 2004’an de li Qosera Mêrdînê li ber mala xwe ji aliyê polîsên tirk ve hatibûn qetilkirin. Ûgûr Kaymaz ê 12 salî bi 13 guleyan hatibû qetilkirin.
Ûgûr Kaymaz û bavê xwe di salvegera qetilkirina xwe de li ser gorên xwe yên li Goristana Taxa Ataturkê hatin bibîranîn. Endam û rêveberên HDP û DBP’ê yên navçe û bajar ên Mêrdînê, endamên Meclisa Dayikên Aştiyê û endam û rêveberên MEBYA-DER’ê tev li bîranînê bûn.
Di bîranîna ku bi rêzgirtinê dest pê kir de Hevseroka HDP’a Mêrdînê Salîh Kûday axivî û diyar kir ku bi derxistina holê ya faîlan û cezakirina wan dikare pêşî li cînayetên zarokan bê girtin.
Kûday da zanîn ku li Kurdistanê zarok bi maşîneyên zirxî tên qetilkirin û wiha got: “Her tişt ji zarokên kurdan re rewa tê dîtin. Zarok dibe, ciwan dibe, extiyar dibe, kî dibe bila bibe dema ku kurd tê kuştin tu dozger û dadgeh li du vê nakevin. Ji ber vê em dibêjin ku bila faîlên Ahmet Kaymaz û Ûgûr Kaymaz bên cezakirin.”
Bîranîn bi xwendina diayan bi dawî bû. MÊRDÎN
