Mikaîl Tore ku di sala 2016’an de li Stenbolê bi îdiaya ‘piştgirî daye rêxistinê’ hatibû girtin û li Girtîgeha Hejmar 2 Tîpa L a Sîlîvriyê tê ragirtin, di axaftina bi telefonê ya bi malbata xwe re kir de binpêkirinên mafan ên li girtîgehê ragihand. Tore diyar kir ku çend hefte ne gardiyan di nîvê şevê de bi ser qawişên wan de digirin û jimartinê li wan ferz dikin û li wan didin.
Tore ji malbata xwe re diyar kir ku binpêkirinên mafan ên li girtîgehan wan bi serdegirtinen bi şev û cezayên hucreyan didome û ev tişt got: “Rêveberiya girtîgehê 3 hefteyên dawî her cure zextê li girtiyên siyasî dikin û li me didin. Me dernaxin hewadariyê. Destûr nadin em werzîşê bikin û cezayê hucreyê li me tê birîn. 20 gardiyan nîvê şevê bi ser qawişan de digirin, qawişên ji hev dixin û pihînan li deriyan didin. Bi dengê bilind hejmartinê digirin. Pirtûkên em dixwînîn qedexe kirine, li qawişan av, tiştên vexwarinê û îskanan nehiştine. Hevdîtinên girtî hatine qedexekirin. Li qantînê dema em tiştan dixwazin diavêjin ber me.”
Malbat Tore li dijî binpêkirinên mafan ên li girtîgehê bang li raya giştî, rêxistinên mafên mirovan û hiqûqî kirin. COLEMÊRG
