Serokê Giştî yê Partiya Guherîn a Tirkiyeyê (TDP) Mûstafa Sarigul di çarçoveya hin serdanan de li Wanê bi dikandaran re hat gelhev. Sarigul û şandeya pê re danê sibehê bi nûnerên çapemeniya herêmî û neteweyî re hevdîtin kir û pişt re li navçeya Rêya Armûşê serdana esnafan kir. Dikandar Haci Tûnç ê di serdana Sarigul de axivî, wiha got: “Ziman çiqas zêde bin, bextewarî jî ewqas zêde ye. Çanda rojhilat gelek cuda ye. Em rojhilat ji bîr nekin. Hevalekî me li Sêrtê got ‘Ev der Kurdistan e’. Beriya hezar, 2 hezar salan ev der Kurdistan bû. Niha jî Kurdistan e. Îtîraz nekin. Yê ku em afirandiye Xweda ye. Xweda kurdî, tirkî û îngilîzî jî dizane.”
Piştî axaftina dikandar Tûnç, Sarigul jî wiha got: “Li ser axa Komara Tirkiyeyê her kes bi azadî qala nîjada xwe, ramana xwe dike.”
Piştî ku Sarigul ji sûkê çû, polîsan bi ser kargeha Tûnç de girt û ew binçav kir.
Beriya niha bi mehekê jî dema ku Seroka Partiya ÎYÎ Meral Akşener serdana Sêrtê kiribû, Cemîl Taşkesen ê esnaf gotibû ‘Evder Kurdistan e’ û Taşkesen jî hatibû binçavkirin. WAN
