Malbatên girtiyan, bi armanca ku girtiyên nexweş, girtiyên ku înfazê wan hatine şewitandin û girtiyên nayên berdan bên berdan, di 16’ê mijdarê de li Baroya Amedê dest bi Nobeda Edaletê kiribûn. Nobeda malbatan di roja 9’an de berdewam dike. Malbat bi biryar in ku heta daxwazên wan bên bersivandin nobeda xwe bidomînin.
Nobeda ku di nava rojê de gelek kes, sazî û komele serdana wê dike îro jî nûnerên Komeleya 78’an çû serdana malbatê.
Di nobedê de Fevziye Kulakan a ku hevjinê wê û lawê wê di girtigehê de ne, axivî û destnîşan kir ku divê êdî girtî bên berdan û ew zilm biqede.
Hasîne Guler a ku hevjînê wê 29 sal in di girtigehê de ye û Yesure Tufan a ku 5 sal in lawê wê girtiye ye jî banga hestiyariya ji bo nobeda edaletê kirin.
Di serdanê de Hevserokê Komeleya 78’an Huseyîn Bariş avivî. Bariş di axaftina xwe de bal kişand ser tecrîdê û wiha got: “Ev têkoşîn, têkoşîna me hemûyan e. Îro li girtîgehan muameleyên kêfî li hember girtiyan berdewan dikin û îşkenceyek mezin li girtiyan tê kirin. Girtî di bin tecrîdek mezin de ne û ew tecrîd xwe li ser hemû qadên civakê nîşan dide. Divê girtiyên nexweş bên dermankirin û berdam.” AMED
