Taxa Bagcilarî ya qezaya Rezanî ya Amedî de Kubra Ekîna 22 serre 18 rojan ra nata vînîbîyaye ya.
Kubra 13ê teşrîna peyêne de keyeyê xo ra vejîyaye û dima tira xeberêke nêameye girewtene. Keyeyê Kubra muracatê qereqolî kerd la hema rêçêkê Kubra nêame dîyene. Dadîya Kubra Rahîme Ozdemîr pare kerd ke beno ke kênaya ci ameya remnayene.
Keyeyê Kubra muracatê Merkezê Heqanê Cinîyan ê Baroyê Amedî zî kerd. Baroyî medyaya dîjîtale ser o muracat vila kerd û vat: ”Seba ke tehqîqat bi hawayêkê aktîfî bêro kerdene û ma dosya teqîb bikerê keyeyî muracatê ma kerd. Seba ke Kubra Ekîn cade bêra dîyene ma do dosya teqîb bikerê.”
Kubra Ekîn menga gulane de cadeyê Lezgîn Avciyî yê Rezanî de wexto ke marketî ra agêrayêne kincanê xo ra semed camêrdêkî hêrişê aye kerdbi. Mudaxeleyê roniştoxanê taxe ra dima camêrd remabi Netîceya hêrişî de didanê Kubra şikîyabî, destê ci birîndar bibi. Kubra wedarîyabî nêweşxane û dima taburcu bibî. AMED
