Navenda Nûçeyan |
Mehmet Emîn Ozkan ê 83 salî ku 26 sal in girtî ye û ji ber kuştina Fermandarê Herêmê yê Cendermeyan ê Navçeya Licê ya Amedê Tûggeneral Bahtiyar Aydin tê sûcdarkirin, bi vîrûsa koronayê ket. Girtiyê nexweşê giran Ozkan, tevî hemû serlêdanan jî nayê berdan.
Bi Ozkan ê li Girtîgeha Tîpa D a Amedê tê ragirtin re, nexweşiyên weke guatr, rûvî, dil, tansiyona bilind, qebzîtî, Alzheimer û nexweşiyên mejî hene. Ozkan di girtîgehê de heta niha 5 caran qeyrana dil derbas kir û 4 caran jî anjiyo bû. Hemû serlêdanên ji bo berdana Ozkan hatin kirin bêencam man. Ozkan nikare bi tena serê xwe pêdiviyên xwe jî pêk bîne, ji ber vê yekê lawê wî Ahmet Ozkan ê bi wî re dimîne lê dinêre. Hat hîn bûn ku Ozkan û kurê wî bi şewba vîrûsa koronayê (Kovîd-19) ketine. Dîsa hat diyarkirin ku girtiyên din jî test kirine lê hêj encama wan aşkera nebûye.
