Navenda Nûçeyan |
Cenazeyê girtiyê nexweş Halîl Guneş ku li Girtîgeha Hejmara 2 a Ewlehiya Bilind a Amedê jiyana xwe ji dest dabû, ji aliyê malbatê ve ji Saziya Tipa Edlî (ATK) hat girtin û ber bi Edeneyê ve hat rêkirin. Di dema girtina cenazeyê Guneş de Hevseroka Giştî ya DBP’ê Salîha Aydenîz, Hevserokê Şaxa OHD’ê ya Amedê Bunyamîn Şeker, rêveberên TUHAY DER, MED TUHAD-FED, HDP’a Amedê û gelek kes amade bûn. Dema verikirina cenazeyê Guneş girseyê tim dirûşmeya ‘Şehîd namirin’, ‘Bijî berxwedana zindanan’ û ‘girtiyên siyasî rûmeta me ne’ hatin berzkirin.
Polîsan xwest mudaxaleyî girseyê bike. Di vê kêliyê de dayikek bi ser hişê xwe çû. Girseyê bi dirûşm û çepikan astengiya polîsan şermezar kir.
Malbatên ku 30 roj in li Baroya Amedê Nobeta Edaletê digirin û îro nobeta xwe veguhestin ber ATK’ê bi van gotinan bertek nîşanî polîsan dan: “Bila êdî ji girtîgehan cenaze dernekevin.” û dirûşmeya ‘Halîl Guneş rûmeta me ye’ berz kirin.
Dê cenazeyê girtî Şûyûr bişînin Sêrtê
Cenazeyê girtiyê nexweş Abdulrezzak Şûyûr ku duh li Girtîgeha Tîpa T a Şakranê jiyana xwe ji dest dabû, ji bo ku sibê bişînin bajarê wî Sêrtê şandin morga Balafirgeha Adnan Menderes a Îzmîrê. Wê cenazeyê Şûyûr sibê saet di 12.30’an de bi balafira kargoyê bişînin Balafiregeha Êlihê. Ji vir jî wê cenazeyê biçe Sêrtê û li Goristana Şêx Mûsa ya navenda Sêrtê bê veşartin.
Malbata Şûyûr beriya 15 rojan pê re têkilî danîbû û axivîbû. Di vê axaftinê de Şûyûr ji malbata xwe re ragihandibû rewşa wî baş e û heke bê tedawîkirina dê nexweşiya xwe ya pençeşêrê derbas bike.
