Girtiyê bi nexweşiya giran Abdulrezzak Şûyûr ê 56 salî ku li Girtîgeha Tîpa T a Şakranê ya Alîagaya Îzmîrê girtî bû, bi awayek guman jiyana xwe ji dest da, cenazeyê wî ji Saziya Tiba Edliyê ya Îzmîrê hat wergirtin û birin Midûriyeta Goristanan a Şaredariya Bajarê Mezin a taxa Gorece ya navçeya Menderesê. Piştî karên ceneze li vir qediya bi balafirê şandin Balafirgeha Batmanê. Li balafirgehê cenaze ji aliyê gelek kesan ve hat pêşwazîkirin û girseyê bi konvoyekê cenaze ber bi Sêrtê ve birin.
Cenaze li goristana Şêx Mûsa ji aliyê hezaran kesî ve hat pêşwazîkirin. Polîsan goristan dorpêç kirin û gotin dê tenê 5 kes cenaze defin bike û destûrê nedin tu kes derbasî goristanê bibe. Polîsan nikaribû xwe li ber girseya gel bigire û gel bi israr dorpêça polîsan ji holê rakir.
Mirinek bi guman e
Di meresîma cenaze de xizmê Abdulrezak Şûyûr, Selîm Ozalp axivî û anî ziman ku mirina Abdulrezak bi guman e û wiha got: “Di raporê de mirina bi guman hat nivîsin. Ji bo ev guman ji holê rabe, destpêkê rêveberên girtîgehê berpirsyar in. Divê demildest sedema mirinê were ronî kirin. Em ê tu carê dest ji ronîkirinê bernedin.
Ozalp da zanîn ku girtî di bin gefan de jiyana xwe derbas dikin û ev tişt anî ziman: “Girtiyên di nava çar diwarî de rastî hemû zext, îşkence, binpêkirinên mafê mirovan û mirinê tên. Hemû ji bi birînê re rû bi rû hatine hiştin. Ji bo nebe dereng ji bo tevahiya girtiyan divê mudaxele bê kirin. Ez ji hemû kesên hatine vir û tev li merasîmê cenazeyê bûne re spas dikim. Em ê heta dawiyê xwedî li têkoşîna Abdulrezak derkevin.”
Em ê tîkoşîna xwe hin xurtir bikin
Pişt re parlamenterê HDP’ê yê Sêrtê Siddik Taş axivî û banga xurtkirina tekoşînê li dijî tecrîdê kir. Taş anî ziman ku ji mirina girtiyên nexweş desthilatdarî berpirsyar e û wiha got: “Tecrîda girankirî ya li girtîgehan bi xwe re mirînê tîne. Ji bo tecrîd ji holê rabe û darbest ji girtîgehan dernekeve divê em têkoşîna xwe xurt bikin.“
Serdanên sersaxiyê wê li mala şînê ya taxa Çalê bên qebûlkirin.
Tûgrûl jî hat veşartin
Girtiyê nexweş ê giran Salîh Tûgrûl ê dema li Girtîgeha Tîpa E ya Sêrtê dima nexweş ketibû û felç mabû, di 13’ê kanûna 2014’an de biryara berdana wî hatibû dayîn, pêr li Nexweşxaneya Bajêr a Mêrsînê ku lê dihat dermankirin jiyana xwe ji dest dabû. Malbatê û rêveberên TUAY-DER’ê cenazeyê wî ji morga nexweşxaneyê wergirtin û ji bo veşartinê şandin bajarê wî Sêrtê.
Cenazeyê ku bi ambûlansê ji Mêrsînê şandin Sêrtê piştî pêkanîna vecîbeyên olî li Goristana Şêx Suleyman a Sêrtê hat veşartin. Parlementerê Sêrtê Siddik Taş, aktîvîstên TJA’yê, Meclisa Dayikên Aştiyê, Rêxistina HDP’ê ya Bajêr, endamê MEBYA-DER’ê û gelek welatî beşdarî merasîma cenazeyî bûn. Dê şîna Tûgrûl li mala wî ya li Mêrsînê were qebûlkirin. SÊRT
