Navenda Nûçeyan |
Rêveberiya Xweser a Bakur û Rojhilatê Sûriyeyê, têkildarî êrîşên dewleta tirk ên li Kobanê daxuyanî da.
Daxuyaniya Rêveberiya Xweser wiha ye:
“Di berdewamiya şerê li dijî gelê me de bi awayekî sîstematîk û di çarçoveya berdewamkirina şerê qirkirinê yê li dijî herêma me de, dewleta tirk bi balafireke bêmirov malek li rojhilatê Kobanê li taxa şehîd Payman kir armanc. Di encamê de hejmarek sivîl jiyana xwe ji dest dan û hinek din jî birîndar bûn, ev yek qonaxeke metirsîdar a şer nîşan dide ku taktîkeke nû ye ji bo têkbirina vîna gelên me û hewldanên wan ên ji bo pêkanîna aramiyê û pêşxistina projeya demokratîk piştî têkbirina DAIŞ’ê.
Em wekî Rêveberiya Xweser a Bakur û Rojhilatê Sûriyeyê sersaxî ji malbatên şehîdan re û ji birîndaran re jî şifayê dixwazin û em piştrast dikin ku em ê têkoşîna xwe ya demokratîk û xebatên xwe yên ji bo pêşîlêgirtina li vegera terorê û parastina istîqrara herêmên me bidomînin. Her wiha em piştrast dikin ku pêwîst e hêzên çalak li Sûriyeyê bi serkêşiya Koalîsyona Navneteweyî û Rûsya, helwestên xwe bi zelalî der barê êrÎşan de diyar bikin, eger ev alî bêdeng bimînin em ê guman bikin ku haya wan ji van êrîşên Tirkiyeyê heye.
Her wiha em bang li civaka navneteweyî, hemû rêxistinên navneteweyî û mafên mirovan dikin ku ji bo pêşîlêgirtina li pêşiya êrîşên dewleta tirk û hedefgirtina herêmên me yên ku rêxistina terorîst a DAIŞ’ê têk birin, bikevin nava tevgerê.”
