Navenda Nûçeyan |
Meclisa Rêveber a Rêveberiya Xweser a Herêma Firatê têkildarî êrişê dewlet tirk li pêşiya avahiya meclisê ya Kobanê daxuyanî da û dewleta tirk şermezar kir.
Daxuyanî ji aliyê Cîgirê Hevserokatiya Meclisa Rêveber a Herêma Firatê Nîhad Ehmed ve hat xwendin. Di daxuyaniyê de hat diyarkirin ku dewleta tirk hewl dide qirkirineke nû li dijî gelê kurd û projeya demokratîk li Bakur û Rojhilatê Sûriyeyê pêk bînê û hat destnîşankirin ku rêjeya êrîşên dewleta tirk zêde bûne, di demekê de ku projeya hevbeş a di navbera pêkhateyan de bi ser dikeve û ji hêviya cîhanê re bûye hêvî.
Ehmed da zanîn ku diyar e ku AKP gihaştiye rêyeke girtî û dixwaze bi rêya êrîşan çavan ji ser aloziya xwe ya aborî di hundir, bigire.
Di daxuyaniyê de bang li civaka naveteweyî û dewletên garanetor hat kirin ku şer li Bakur û Rojhilatê Sûriyeyê rawestînin, rola xwe di sekinandina hovîtiya dewleta tirk de bisekinin da ku bi hevre ewlehî û aramiya herêmê biparêzin.
Hêzên Ewlekariya Hundirîn êrişa li dijî Kobanê şermezar kir
Fermandariya Giştî ya Hêzên Ewlekariya Hundirîn a Bakur û Rojhilatê Sûriyeyê jî der barê êrîşa dewlet tirk a li ser Kobanê daxuyanî da û wiha got: “Balafireke dewleta tirk a dagirker malek li taxa Şehîd Peyman a bajarê Kobanê kir armanc. Di encamê de 2 welatiyên sivîl jiyana xwe ji dest dan û 7 sivîl jî birîndar bûn.
Em wekî Hêzên Ewlekariya Hundirîn a Bakur û Rojhilatê Sûriyeyê van êrîşên faşîst şermezar dikin û bang li civaka navneteweyî dikin ku pabendî soz û peymanên navneteweyî yên parastina maf û mal û milkên sivîlan bin. Her wiha zextê li dewleta tirk bikin da ku êrîşên bi vî rengî dubare neke.”
