Rêxistina HDP’ê ya Amedê li navçeya Hênê û Pîranê civînên gel li dar xistin. Cîgirê Hevserokatiya Giştî ya HDP’ê Tayîp Temel, Hevserokên HDP’a Amedê Gulistan Atasoy û Zeyyat Ceylan tev li civînên li avahiyên navçeyan bûn. Di civînê de guh li rexne û pêşniyarên gel hatin kirin û xebatên hatine kirin hatin nirxandin.
Tayîp Temel ku di civîna li navçeya Hênê de axivî, diyar kir ku armancên 2023’yan ên AKP’ê li ser esasên ‘yek dewlet, yek netew, yek al’ ne û wiha got: “Cudahî hemû tune tên hesibandin. Dixwazin gel asîmle bikin, qir bikin. Dixwazin vê yekê jî bi êrîşên li ser kurdan pêk bînin. Kurdan tu carî serî li ber feraseta tekparêz a AKP’ê netewandiye û tim li ber xwe daye. Dê rê nede xeyalên 2023’yan ên AKP’ê jî.”
Temel destnîşan kir ku dê kurd bi têkoşîna xwe komara demokratîk ava bikin û wiha domand: “Kurdan bi têkoşîna xwe ya azadiyê dawî li îktîdara zordest anî. Kurdan bedêlên mezin dan, lê bi berxwedana kurdan, AKP’ê rûxand.”
Her wiha guh li rexne û pêşniyarên gel ên têkildarî polîtîkayên partiyê û xebatên wê jî hatin kirin.
Piştî civînê banga ji bo mîtînga HDP’ê hat kirin ku dê di 22’yê çileyê de li Amedê li dar bixe. AMED
