Vervatoxa HDPyî Ebru Gunay Merkezê Pêroyî yê HDPyî de kombîyayîşê çapemenîye de rojdem ercna.
Qiseykerdişê Gunaye ra beşêk wina yo:
“AKP seba ke raştîyan binimno hêrişê partîya ma keno. Her hêrişê vera HDPyî hêrişê vera demokrasî yo. Ê hêrişê ameyoxê Tirkîya kenê. Hêzê demokrasî ganî pîya HDPyî bipawê û vera faşîzmî têkoşîn bikerê. Ma bi hawayêkê eşkerayî îqtîdarî rê vanê ke şima do bin bikewê. Pê hêrişê vera HDPyî ê do nêeşkê netîceyêke bivisnê destî.
Heta ke HDP estbo şima do nêeşkê ser bikewê la hêzê demokrasî, cinî, ciwan û şarê Tirkîya do ser bikewê. Hemkaro qij ê îqtîdarî tim qala mendebîyayîşî keno la ney rê qestê înan rijnayîşê welatî yo. Destsernayîş, torpîl, talanî sey mendebîyayîşî mojnenê. Seba meseleyanê nikayênan vateyê înan çin o. Têna pê hêrsî têgêrenê. Vanê ‘Ma HDPyî nêwazenê.’ Ma nika eşkera vanê ke ma paştdayîşê bi mîlyonan kesan girewt. Bi paştdayîş û hêzê şarê xo ma do Meclîs de bibê.
Dewayê kumpasî yê vera partîya ma netîceya hêrişkarîya îqtîdarî yê. Fezlekeyê vera Semra Guzel erşawîya komîsyonî. No dişmenîya vera kurdan û demokrasî ya. Ma dî ke îqtîdarî heta nika teda û kumpasê senînî vera Tirkîya kerdî. Kerdişê vera DEPî vîrê pêro merdiman de yê. Wekîlîya Leyla Guven, Musa Farisogûllari û Omer Faruk Gergerlîogluyî ameybî betalkerdene. No tradîsyonê Tirkîya û îqtîdarî yo. Ma pê hêzê xo û tradîsyonê xo têkoşînê xo rê do dewam bikerê, HDP ho payan ser de yo. Ma ameyoxê Tirkîya yê. Ma do pîya têkoşîn bikerê.”
Gunaye peynîya qiseykerdişê xo de venga pêro kesan da ke 22ê çeleyî de bi şîarê ‘Ma HDPyî pawenê’ tewrê mîtîngê Amedî bibê. ANQARA
