Meclisa Malbatên Şehîdan îro ragihand ku çalakiya xwe ya li Sêmalkayê bi dawî kirine û dê çalakiyê li deverên din li dar bixin.
Meclisa Malbatên Şehîdan di 5’ê cotmeha 2021’an de bi armanca wergirtina cenazeyên şehîdên kemîna Xelîfanê çalakiya konvedanê li deriyê sînor ê Sêmalkayê dabû destpêkirin.
Îro bi sedan şêniyên navçeyên Dêrik, Girkê Legê, Çilaxa, Til Koçer û Tirbespiyê serdana çalakiyê kir.
Hevserokê Meclisa Malbatên Şehîdan a Girkê Legê Îhsan Şiblî daxuyanî da û ev tişt parve kir:
“Ji 4 mehan ve, me çalakiya xwe li dar xistiye. Tevî bangewaziyên aştiyane lê rayedarên PDK’ê daxwazên me bê bersiv hiştin. Çalakiya me aştiyana û mirovî ye. Ji mafê dayikan e ku cenazeyên şehîdên xwe hildin. Heta ku ev armanc pêk were, em ê çalakiya xwe û berxwedana xwe berdewam bikin. Çalakiya li Sêmalkayê bi dawî bû lê em ê li deverên cuda bi rêyên aştiyane çalakiya xwe berdewam bikin. Em spasiya hemû welatî û saziyan dikin ku piştgiriya daxwazên me kirin.”
Her wiha di dawiya çalakiyê de berxwedana HSD’ê hat silavkirin. QAMIŞLO
