Navenda Nûçeyan |
Navenda Ragihandinê ya Meclisa Leşkerî ya Minbicê got ku dewleta tirk a dagirker duh bi şev saet di 11:00 de ji baregeha Şêx Nasir, gundên El-Seyada û Yalinlî yên li bakur rojavayê Minbicê û bajarokê Erîma yê rojhilatê Babê kirin hedef.
Meclisê diyar kir ku hêzên wan bersiva jêderên êrîşan dane û di encamê de şer bi çekên giran û navîn di navbera Meclisa Leşkerî ya Babê û çeteyên dewleta tirk a dagirker de rû daye. Çeteyan gundên Kur Hedok, Kawûklî û El-Bûweyhec ên li rojhilatê Babê kirin hedef.
Di 20’ê çileyê de çeteyan êrîşî girtîgeha Sînaa ya li taxa Xiwêran a Hesekê kir. Piştî wê bi rojekê, dewleta tirk a dagirker wesayîteke leşkerî ya Meclisa Leşkerî ya Til Temirê ku diçû piştgiriya HSD û Hêzên Ewlekariya Hundirîn, kiribû hedef.
Di heman rojê de dewleta tirk a dagirker wesayîteke YBŞ’ê kir hedef.
Di 22’ê çileyê de dewleta tirk a dagirker û çeteyên wê bi dijwarî Eyn Îsayê topbaran kir. Lê HSD’ê ew êrîş şikand.
