Andreas Kirstein ê ji Lîsteya Alternatîve (AL) ku tev li kampanyaya derxistina PKK’ê ya ji lîsteya ‘rêxistinên terorê’ ya Yekitiya Ewropayê bûye, di heman demê de endamê Pira Biratiyê ya Zurîch-Amedê ye.
Ji beşdarên kampanya Însiyatîfa Edalet ji bo Kurdan Andreas Kirstein diyar kir ku ji bo aştiyeke mayinde ya li Kurdistanê û Rojhilata Navîn divê PKK ji ‘lîsteya terorê’ bê derxistin.
Kirstein li ser kampanyayê bal kişand ser civaka kurd a li Ewropayê û diyar kir ku nabe ew bi xemsarî nêzî zilm, zext û binpêkirina mafên mirovan a li dijî gelê kurd bibin. Kirstein got “Ji bo çareserkirina pirsgirêka kurd tev li gelek karî bûm û bi vî rengî min xwest bikim ku zilm û zexta li gelê kurd tê kirin, bê dîtin. Ez piştgiriyê didim têkoşîna PKK’ê û dixwazim PKK ji ‘lîsteya terorê’ bê derxistin. Bi baweriya ku wê piştgiriyê bide têkoşîna gelê kurd min mohra xwe danî binê belavokê.”
Kirstein destnîşan kir ku ji bo li Kurdistanê û Rojhilata Navîn aştî mayinde bibe, şert e ku destpêkê PKK ji lîsteyê bê derxistin û ji bo şerê navbera PKK û dewleta tirk bi dawî bibe divê dewletên navneteweyî bikevin dewrê û zextê li dewleta tirk bikin.
Kirstein ragihand ku Yekitiya Ewropa ji ber şantaja li ser penaberan tê kirin û ji ber peymanên leşkerî û bazirganiyê, kiryarên li dijî gelê kurd ji nedîtî ve tê û got, “PKK nûnera rewa ya gelê kurd e. Bidawîkirina krîmînalîzekirina PKK’ê wê bike ku zext li Tirkiyeyê bê kirin û di hevdîtinên aştiyê de PKK muxatab bê dîtin. Divê Ewropa ti carî rol û berdêla gerîlayan ji bîr neke ku di tunekirina DAIŞ’ê de bi roleke mezin rabûn. Bi saya şervanên kurd xelkên Ewropayê ji çeteyên cîhadîst hatine parastin.”
