Navenda Nûçeyan |
Di şeva 1’ê sibatê de, balafirên şer ên dewleta tirk bi awayên hemwext êrîşî Wargeha Penaberan Mexmûrê, Şengal û Dêrika rojavayê Kurdistanê kir. Di êrîşê de li Mexmûrê 2 endamên Hêzên Parastina Cewherî, li Şengalê 3 sivîl û li Dêrikê jî 4 şervanên HSD’ê şehîd bûn.
Endama Rêveberiya Yekitiya Nîştimaniya Kurdistanê (YNK) Hesîbe Ebdullah li ser mijarê ji Ajansa RojNewsê re axivî.
Hesîbe Ebdullah wiha got: “Em weke YNK’ê van êrîşên dewleta tirk şermezar û mehkûm dikin. Tirkiye bi tenê nikare van êrîşan bike, bi piştgiriya aliyek siyasî yê kurd dike ku serwerî, sînor û esmanê Iraqê û Herêma Kurdistanê derbas dike. Ev hemû xala reş ên rejîma Erdogan û hevkarên wê ne. Êdî nabe hikûmeta Iraqê bêdeng be.”
PDK nebe alîkar Tirkiye nikare êrîş bike
Ebdullah diyar kir ku ev êrîş hewldanek bêencam in û wiha domand: “Êrîşekî faşîstane ye. Dixwazin xelkê bê îrade bike û îradeya wan radest bikin. Li gel civaka xelkê Kurdistanê û Iraqê jî aşkera ye ku PDK hevkarê Tirkiyeyê ye, eger bi piştgirî û alîkariya wan nebe, wê Tirkiye nikare wiha bike û li nava xaka Kurdistanê sûc bike ku ji esman û bejahî ve êrîş dike û çend baregehên Tirkiyeyê yên sereke li ser xaka Herêma Kurdistanê heye.”
Divê PDK wek hikûmetê bersiv bide
Hesîbe Ebdullah bal kişande ser bêdengiya hikûmeta başûrê Kurdistanê û ev tişt anî ziman: “PDK weke hikûmet bersiv nade. Ji ber ku hevkar û piştgirî û piştevan e. Her tişta ku bi navê parastina xaka Herêma Kurdistanê dike, tenê berjewendiye, di rastiyê de tiştek wiha nîne. Niha PDK, nava mala kurdan belav kiriye û bi cih hiştiye. Diçe di nava du eniyên şîe û sunî de navbeynkariyê dike. Hewla rêxistina mala şîeyan dike. Ev jî kiriye berjewendî û bi iraqiyan difiroşe.”
Tirkiye ketiye nav hewldanên zindîkirina DAIŞ’ê
Hesîbe Ebdullah diyar kir ku di vê demê de çavê her kesê li ser rojavayê Kurdistanê û gerîlayên PKK’ê ye û axaftina xwe wiha bi dawî kir: “Ev hewldanên Tirkiyeyê yên ji bo lêdana Qendîl û rojavayê Kurdistanê ji bo zindîkirina DAIŞ’ê ye. Dixwazin dubare bihêz bikin û rêxistin bikin. Ev hemû hewildanên vala ne û dê pêk neyên. Îradeya pola ya xelkê Kurdistanê, şervan û gerîlayên PKK’ê gelek ji wan bihêztir e. Wê didawiyê de serkeftin her ya wan be.”
