Navenda Nûçeyan |
Parêzerên endamên Komeleya Hiqûqnasên Ji Bo Azadiyê (OHD) têkildarî tecrîda li ser Rêberê Gelê Kurd Abdullah Ocalan û girtiyên li cem wî Omer Hayrî Konar, Hamîlî Yildirim û Veysî Aktaş û astengiya hevdîtina parêzeran û malbatan daxuyanî dan. Endam û rêveberên OHD’ê li Amed, Wan, Colemêrg, Riha, Stenbol, Îzmîr û Mêrsînê daxuyaniyên hevpar dan.
Endam û rêveberên OHD’a Amedê li ber Edliyeya Amedê daxuyanî dan. Gelek parêzer bi cubeyên xwe beşdarî daxuyaniyê bûn.
Endamê OHD’ê Muhîttîn Muguç daxuyanî xwend û da zanîn ku Ocalan di 15’ê Sibatê de bi hevkariya navdewletî ji paytexta Kenyayê Naîrobî bi tunehesibandina hiqûqa gerdûnî anîn Tirkiyeyê û vê yekê di warê polîtîk, aborî û civakî de bandorek neyînî li ser herêmê kir û destnîşan kir ku di nava van 23 salên dîlgirtina Ocalan de her ku çû krîz kûrtir bûn û pirsgirêka kurd jî nehat çareserkirin.
Bandora tecrîdê li ser civakê
Muguç bi bîr xist ku ji 25’ê Adara 2021’an ve agahî ji Ocalan nayê girtin û tecrîdkirina Ocalan li ser tevahiya civakê bandorek neyînî dike. Muguç bal kişand ser cihêkariya li hember Ocalan û got ku li hemberî Ocalan û girtiyan qanûnên cihêkar tên bikaranîn.
Divê hevdîtin pêk were
Muguç anî ziman ku sepanên dijmirovî yên li girtîgehên Tirkiyeyê çavkaniya xwe ji pergala tecrîda ji Îmraliyê digire û bandorek neyînî li ser tevahiya girtîgehan dike. Muguç diyar kir ku Ocalan 23 sal in ji bo aştiya civakî û demokrasiyê di nava hewldanan de ye û ew ji bo xêr û menfata civakê dixwaze aştî pêk were û divê şertên wî di çarçoveya hiqûqî de werin rastkirin.
Muguç destnîşan kir ku divê di serî de Ocalan bi malbat û parêzerên xwe re tavilê dikaribe hevdîtinan bike û heke hevdîtinên li gorî qanûnê werin kirin dê ji bo çareseriya krîzên civakî gav werin avêtin û anî ziman ku ew gazî rayedaran dikin ku li gorî rêgezên hiqûqa gerdûnî tevbigerin û berpirsiyariya xwe ya destûra bingehîn bicih bînin.
Her wiha şaxên OHD’ê yên Wan, Colemêrgê, Riha, Stenbol, Mêrsîn û Îzmîrê jî têkildarî heman mijarê daxuyanî dan û xwestin ku tavilê tecrîd were rakirin û hevdîtin bi Ocalan re pêk were.
