Hêzanê Demokrasî û Kede yê Dêrsimî, Serekê Cemxaneyê Duzgun Babayî Sînan Kirmiziçîçek, îdarekaranê cemxaneyî vera gefanê Qeymeqamê Qisle cemxane de kombîyayîşê çapemenîye da. Eşkerayîye de pankarta bi nuşteyê ‘Destê xo fîrazîyanê ma ra biancê’ ameye akerdene.
Kirmiziçîçekî ard ziwan ke înan gerreyê Tutkanî kerdo û vat: ”Îbadetxaneyê ma tîcaretxane nîyê, destê xo medê îbadetxaneyanê ma.”
Hemsereka Komeleyanê Elewîyan ê Demokratîkan (DAD) Kadrîye Dogan zî îfade kerd ke ê wazenê kamyew hêzî bimojnê û vat: ”Tîya cayê ma yo fîraz o, ma do tim bêrê tîya.”
Hemşaredarê Pêrî Orhan Çelebîyo ke herinda ci de qeyûm amebi tayînkerdene vat: ”Elewîyan bedelê pîlî dayî, qirkerdişê pîlî dîyî. La reyna zî elewîyan têkoşînê hemwelatîya têduşte ra fek vera nêda. Hişmendîya ke pê hêzê dewlete huqûq çin kerd, tim bi xo çin bîye.”
Hetê bînî ra DADî zî derheqê babete de eşkerayîyêke daye û waşt ke Qeymeqamê Qisle cade wezîfe ra bêro girewtene. DADî vat: ”Çew nêeşkeno pê çeke, zûre û nefîsî debikewo meqamî. Elewîyanê Raya Heqîye dewletê ke hêzê xo mojnayêne zaf dîyî. Bê ke berê ma de nîyaz bikera dewlete zî nêeşkena rayîr a şora. Eke qeymeqam nêzaneno wa biewno Osmanî û Selçukîyan.” DÊRSIM
