Roniştişê dewaya vera Komeleya Paştdayîş û Hetkarîye yê Alîmanê Dînî (DÎAY-DER) Mehkemeya Cezaya Girane ya Stenbol de ewro dest pêkeno. Dewa de 8ê ci tepişte 23 malayî yenê muhakemekerdene.
Roniştişî ra verî endam û keyeyê DÎYA-DERî, Komeleya Huqûqnasan a Seba Azadîye (OHD), HDK, HDP, temsîlkarê rêxistinanê komelê sivîlî ameyî yewca û înan eşkerayîye daye.
Endamê DÎAY-DERî Mala Yusuf Înalî seba paştdayîşî her kesî rê sipas kerd û vat: ”Hê ma mehkemeyanê engîzasyonî de muhakeme kenê.” Înalî venga her kesî da ke wa paştî bido înan.
Wekîlê HDPyî yê Kocaelîyî Omer Faruk Gergerlîogluyî zî pare kerd ke derheqê îdîaya sûcan de yew delîl çin o û falîyetê DÎAY-DERî sey îlegalî ameyî mojnayene. Gergerlîogluyî vat: ”Kurdkî ziwanêkê Homayî yo. Îdîanemeyê dewa komîk o.”
Wekîlê HDPyî yê Stenbolî Alî Kenanogluyî zî vat ke ê sey Komîsyonê Heqan û Bawerîyan ê HDPyî û Masaya Elewîyan dewa teqîb kenê û hetê malayan de yê. Kenanogluyî vat: ”Ê merdimabê ke bi ziwanê xo îbadet kenê muhakeme kenê. Ma ney qebul nêkenê.”
Avûkatanê dosya ra Serhat Çakmakî dîyar kerd ke beyanê 20 serrî verî îlaweyê dosya ameyê kerdene û sey îdîa ameyê mojnayene. Çakmakî da zanayene ke tehqîqatê 2007î ra komeleyêka bîne yena muhakemekerdene. AMED
