Polîtîkayê neyarîya cinîye de îqtîdar, raporo ke Sazgehê Tîpê Edlî dano zî zafêr bî. Serranê dimayî de cinîyê ke qatanê berzî ra yenê eştişî de û yenê qetilkerdiş, cinîyê ke yenê tecawuzkerdiş, hetê Sazgeha Tîpê Edlî (ATK) ra nînê tesbîtkerdiş, yan zî raporê înan mêrdeyan xurt kenê. Yew qerarê ATKyî ra; yew Şûle Çete ya a bîn zî Eda Nûr Kaplan a.
29ê Gulane ya 2018ine de Anqara de Şûle Çet hetê Çagatay Aksoy û Berk Akanî ra amî tecawuzkerdiş. Sewîyeyê cipersayîşî de pisporê ATKyî Mehmet Nûrî Aydin raporo ke ‘Eke cinîyêke mêrdeyî dir cayêko bêveng de alkol bişimo û eke hela şêro keyeyê ey yo ke kes ci de çinî yo, no yeno mehnaya ke têkilîya cînsîyî qebûl kerdo’ da. Serê reaksîyonê rayaumûmî Mehmet Nûrî Aydin wezîfeyî ra ame manîkerdiş. Sewbîna 17ê Tebaxe ya 2021î de Anqara de Eda Nûr Kaplan întîxar kerd. Vejîya meydan ke Mehmet Ardiçoglû û Yûsûf Guzelyûrtî tecawuz kerdo û Eda Nûr Kaplan şîya qereqole gerre kerdo. Raporê Eda Nûr Kaplan de ame vatiş ke, doneyê tecawuzî çinî yo. Parlementera HDPyî ya Stenbolî Zuleyha Gulum derheqê raporanê ATKyî de erjnayîş kerd.
‘Raporî tesaduf nîyê’
Zuleyha behs kerd ke ATKyî bi zemînê îdeolojîyê îqtîdarî dir hereket kenê û tena nê dewayê cinîyan de derheqê tepişteyanê nêweşan de zî qerarê înan baleanteyê. Zuleyha wina behs kerd: “Asayo ke ATKyî binê zemînê îqtîdarî de hereket kenê. Merdimê ke ûca de yê goreyê înan yenê tayînkerdiş. Yan nê, eynî terzî de hadrekerdişê raporan tesadufî nîyê. Îqtîdar wextêke yo derg û dila yo babeta cinî de polîtîkayê ke mêrdan berz bikero, keno. Wedaritişê Pêkerdişê Stenbolî dir zî no asan ramojnayo.”
‘Zîhnîyetê serdestîyê mêrdeyî tesîr serê raporan de zî keno’
Zuleyha dîyar kerd ke tesîrê vatişê îqtîdarî tena nê serê komele de, serê ATKyî de zî keno û wina behs kerd: “Dewlete tena bi vatiş û qanûnanê ke vejinenê hêriş nêkena. Sazgehanê xo dir zî hêriş kena. ATK û Dîyanet nê sazgehan ra yê. Her tim vatişê neyarîya cinîyan rê kenê, anê ca. Eşkerayo ke cinî duştê şîdetî de sere çewtîye bikero, danê. Wexto nîyadîyayîşêke bêro girewtene, Dîyanetî ra gênê. ATK zî zîhnîyetê mêrdeyî rê xizmet keno. ATK yo ke zîhnîyetê serdestan rê hereket keno, bêşik raporê ci zî negatif o.”
‘Dewaya Şûle Çet û Eda Nûr Kaplan’
Zuleyha fînaka Şûle Çet wina da: “ATK nîyadîyayîşêke wina vano, la heqê înan çinî yo nîyadîyayêşêke wina bibo. ATK hetê teknîkî ra ganî nîyadîyayîşê xo vajo. Pêwa nê hekîmêke nîyadîyayîşê xo vano û no mimkun nîyo ke bêro qebûlkerdiş. Eke cinîyêke şêro verê embazê xo yan zî nasêke xo, no nîno mehnaya ke waştiş bibo. La zîhnîyetê serdestîya mêrdeyî nê nizdîbîyayîşê xo raporî de nuşt o. No hekîm xo ra hetê TTByî ra ame cezakerdiş. Raporan dir hewl danê ke serê tecawuzan binimnê. Babeta tepişteyê nêweşan de zî dest bi qerarê sîyasî yenê dayîş. Tewr peynî qeraro ke dayo, derheqê Aysel Tugluk de yo. Ganî ma nê raporê ATKyî bigîrê rojeva xo û ganî rojeve de bêro mendiş.” ANQARA
