Dêrsimo ke merkezê têkoşînê cinîyan û şaristano xoverdayox ê Vakurê Kurdîstanî yo, hedefê polîtîkayanê qirker û kolonyalîstan ê dewlete de yo.
20ê gulane de serê rayîrê Dêrsim-Pulurî de cinîya bi nameyê V.Y. wexto ke pabeyê otobuse bîye bi bahaneya ke ”vergumanê xokiştişî ya” raşta şîdetê di leşkeran ameya. Cinîya ke mudaxeleyê dormeyî ra dima xelisîyaye gerreyê di leşkeran kerd. Di leşkerî karî ra ameyî dûrvistene. Dewlete Dêrsim de çalakîyê 25ê Teşrîna Peyêne Roja Têkoşînê Vera Şîdetê Serê Cinîyan zî qedexe kerdbî.
Cinîyanê Dêrsimî 27ê teşrîna verêne ya 2020î vera serebûtêkê tacîzî çalakîyêke kerde. La cinîyan rê bi bahaneya ‘qedexeyê çalakîyan’ cezaya pereyî ya 3 hezar û 150 lîra ameye dayene û derheqê înan de tehqîqat dîya destpêkerdene.
Di serrî yo Dokuye vînîbîyaye ya
Wendekara Gulîstan Dokuye 5ê çeleyê 2020î ra nata Dêrsim de vînîbîyaye ya. Vergumano serek ê serebûtî Zainal Abarakov hetê Walîyê ê çaxî yê Dêrsimî Tuncay Sonerî ra ame remayene Rûsya û dewlete delîlî reş kerdî. La keyeyê Dokuye rê cezaya pereyî û destbendkerdişî yenê ferzkerdene. Keyeyê Dokuye çend rojî verî waşt verê bînaya Wezîrîya Edaletî de nobeta edaletî bikero la hetê polîsan ra ame destbendkerdene.
Cinîyê Dêrsimî 8ê Adare de do meydanan de bibê
Endama Platformê Cinîyan ê Dêrsimî Yeşîle ard ziwan ke 8ê Adare de ê do meydanan de bibê û venga pêro cinîyan da ke tewrê çalakîyan bibê.
Yeşîle vist vîrî ke her roje qirkerdiş, tacîz, tecawuz û şîdetê vera cinîyan zêdîyenê la ê do qetî Peymana Stenbolî ra fek vera medê. Yeşîle bale ante serebûtê Dokuye ser û vat: ”Tehqîqatê serebûtê Gulîstane Doku bi hawayêkê tesîrînî nêame kerdene û ame waştene ke mesuldarî bipawîyê û serebût vîran ra şoro. Heta ke Dokuye bêra dîyene ma têkoşînê xo rê dewam kenê. Ma do tim persê vajê ‘Gulîstan Dokuye ça de ya?’ ”
Yeşîle îfade kerd ke ganî ziwanê kurdkî bibo ziwano fermî û dibistanan de perwerdeyê bi ziwanê dayîke bêro caardene.
Yeşîle dîyar kerd ke ganî pêro tepişteyê nêweşî bêrê veradayene û vat: ”Seba tepişteyanê nêweşan zî têkoşînê ma do dewam bikero. Wextê ci ameyo ke dêsê merg, ters, teda û şîdetî bêrê rijnayene û cinîyî bibê yew.
Bi wesîleya 8ê Adare Roja Cinîyan a Dinya ma venga pêro cinîyan danê ke vejîyê waran. Ma bi hêrs, serewedaritiş, qal û rengê xo têkoşînê xo yê seba cuya têdûşt, azade û bêşîdete bibê yew.”
Cinîyê Dêrsimî 8ê Adare de kuçeyê Hunerî de çalakîyêka rayraşîyayîşî bikerê û Meydanê Seyîd Rizayî de mîtîngêk bikerê. DÊRSIM
