Dezgehê Îstatîstîkî yê Tirkîya (TUÎK) 4ê adare de raporê xo ”Bi îstatîstîjan rewşa cinîyan a 2021î” mîyanê komelî de qala rewşa cinîyan kerde.
Rixmo ke nêmeyê nufusî cinîyan ra yeno pê, mîyanê kesanê 15 serran ra pîlêran de nîsbetê cinîyan ê xebatkaran se ra 26,3 û ê camêrdan zî se ra 59,8.
Nîsbetê îstîhdamî yo tewr qij şaristananê Mêrdîn, Êlih, Şirnex, Sêrt de yo û nîsbetê îstîhdamî yo tewr pîl zî Tekîrdag, Edîrne û Kirklarelî de yo.
Hetê bînî ra cinîyê ke wayîrê domanan ê, cuye ra qerifîyenê. Mîyanê keyeyanê ke domanê înan 3 serrî ra qijêr ê de nîsbetê îstîhdamê cinîyan se ra 25,2 o. Goreyê îstatîstîkan wexto ke asta perwerdeyî ya yew cinîye zêdîyena nîsbetê îstîhdamî zî zêdîyena.
Goreyê îstatîskan serra 2007î de, nîsbetê wekîlan ê cinîyan se ra 9,1 bi la serra 2021î de no nîsbet bîyo 17,4. Ganî bêro vatene ke 67 wekîlanê HDPyî ra 25 wekîlê ci cinî yê û mîyanê pêro partîyan de tewr zaf HDP de wekîlê cinîyî estê. STENBOL
