Îro salvegera Nobeda Edaletê ya Malbata Şenyaşar ku dengê daxwaza wan edaletê li tevahiya Tirkiyê olan da ye. Çalakiyê ango nobedê salek li pey xwe hişt. Beriya hilbijartina 24’ê hezîrana 2018’an li navçeya Pirsûsê ya Rihayê di 14’ê hezîrana 2018’an de xizm û parêzvanên parlamenterê AKP’ê Îbrahîm Halîl Yildiz êrîşî ferdên malbata Şenyaşar kirin û 3 ferdên malbatê kuştin. Emîne Şenyaşar û lawê xwe Ferît Şenyaşar ji bo di dozê de edalet pêk were û dosyeya qetlîama li ber Nexweşxaneya Dewletê ya Pirsûsê bê vekirin, ferdê malbatê Fadil Şenyaşar girtî ye bê berdan, ji 9’ê adara 2021’an ve li ber Edliyeya Rihayê Nobeda Edaletê digire. Nobeda Edaletê ya Malbata Şenyaşar di roja 366’emîn de berdewam dike. Malbatê li ber Edliyê di salvegera yekemîn de nobedê da destpêkirin.
Malbatê pankarta “Hevjînê min û du kurê min li nexweşxaneyê qetil kirin. Kesek girtî tune ye! Kurê min li ser fermana hiqûqa serdestan hatiye girtin û 4 sal in di hucreyekê de ye. Ez dixwazim kurê min tavilê bê berdan. Ji bo malbata Şenyaşar û ji bo her kesî edalet” li cihê nobedê daliqand.
