19ê adare de qezaya Bîsmîlî ya Amedî de Newroze ameye pîrozkerdene. Seba ke di wayê diletî yê panc serreyî pê kincanê xo yê neteweyîyan tewrê şayîye bîyî pîya bi dayîka xo Zeynebe B. Ameybî destbendkerdene. Merkezê Heqanê Qican ê Baroyê Amedî vera naye nêrazîbîyayîş ramojna û vat înan gereyê kesanê eleqedaran kerdo.
Baroyî hesabê xo yê medyaya sanalî ra eşkerayîye daye û dazanayene ke dayîke Zeynebe B. pîya bi wird kênaya xo bîlaheq ameya destbendekrdene. Eşkerayîye de nê ameyî parekerdene: ”Seba ke kincanê înan de rengê çeqer, sûre û hewzî bibî destûr nêdîya wird wayê diletî dayîka xo ya pîya debikewê warê şayîye, kincê înan ameyî vetene û ameyî destbendkerdene. Hemwelatîyê ke pê kincanê xo yê neteweyîyan tewrê şayîye bîyî raştê astenkerdiş û hêrişê polîsan ameyî. Goreyê qanûnan qicê binê diwês serran nêeşkenê bêrê destbendkerdene. Xora semedê nê destbendkerdişî sûc û şik zî çîn o. Seba ke heqê nê qican ameyo binpaykerdene ma gereyê polîsan û dozgerê cipersayîşî kerd. Ma do sey baroyî prosesê huqûqî teqîp bikerê.” AMED
