Di sibata sala 1992’yan de gundên Qurdîsê, Kaniya Şêx û Kurika Çeto yên bi ser navçeya Artûklûya Mêrdînê ji aliyê dewletê ve hat xwestin bê valakirin û li ser vê yekê bûyer derketibûn. Veysel Îlhan di bûyeran de hatibû girtin. Cezayê muebedê li Îlhan hatibû birîn. Îlhan cezayê xwe qedand û ji Girtîgeha Bandirmayê ya Jimara 2’yan a Tîpa T’yê hat berdan. Malbat û hevalên wî ew li ber girtîgehê pêşwazîkirin. Kêfxweşî di pêşwazîkirinê de hebû. Îlhan û xizmên xwe wêne girtin.
Îlhan beriya biçe cem malbata xwe ya li Stenbolê rûdinê ji Ajansa Mezopotamyayê re axivî. Îlhan destnîşan kir ku ew niha di nava hestên kêfxweş, xemgîn û cuda de ye û wiha got: “Kesek ku 30 sal di hepsê de mabe dikare wan hestan bizanibe. Hestek ku nayê tarîfkirin. Helbet ez niha nikarim adapte bibim. Hestek pir cuda bi min re peyda bû. Ez hêvîdarim ku wê hevrêyên min ên di zindanan de tên girtin, bibin xwedî van hestan. Bi rastî jî hestek pir cuda ye. 30 sal di hepsê de bimîne, tenê dimînî, bêkes dimînî, mirovên nû nas dikî, tu jiyana xwe li wir ava dikî. Tiştek pir cuda ye…”
