Tepişte Mehmet Sevînço 63 serre ke 28 serrî bi tepişte bi û Zîndanê Tîpê T yê Akhîsarî de ameyîne tepiştiş, 3yê Nîsane de bi hawayêke biguman gonî şîbî serê mezgê ey, nêweşxaneyê ci de ameyîne dermankerdiş, dinyaya xo bedilnabi. Cenazeya Mehmet Sevînçî dimayê karê otopsîyî Sazgehê Tipê Edlî (ATK) ê Îzmîrî teslîmê keyeyê ey ame kerdiş. Cenazeya Mehmet Sevînçî vizêr bi teyerayê kargoyî Teyaregehê Adnan Menderesî ra ardî Teyaregehê Sabîha Gokçen.
Keyeyo ke wesayîtê cenaze nêdayî, bi îmkananê xo vizêr şan de ardî morgê Camîyê Pîrî Reîs yê Taxa Pîrî Reîs ê qezaya Darica ya Kocaeli. Cenazeya Mehmet Sevînçî seba ke Goristanê Nene Hatûn ê Daricayî de defin bikerê, kewt rayîr.
Polîsan dekewtişê qezaya Daricayî de konvoya cenazeya Mehmet Sevînçî vindarna û keyeyî tehdîd kerd ke sloganan berz nêkerê.
Cenazeya Mehmet Sevînç ke ardî Camîyê Pîrî Reîs, hetê mela ra bi mehnaya “qedexe” yo nêame şûtiş û wecîbeyê dînî nêameyî kerdiş. Melayêk ke keye bi îmkananê xo ard, cenazeya Mehmetî şût û wecîbeyê dînî bi ca ard.
Welatijê ke seba tewrê merasîmê cenaze bibê bi wesayîtê xo ameyî, bi mehnaya wesayîtê xo derûdorê camî de park kerdê, cezaya pereyî înan rê ameye birnayîş.
Muxabirê ajansê ma û Ajansê Xeberan ê Mezopotamyaye (MA) ke seba merasîmê cenaze taqîb bikerê, şî camî, hewl dayî bêrê astengkerdiş. Polîsê ke rojnamegeran kerdî binê ablûqa, nasnameyê înan kontrol kerdî, serê înan de gêrayî û şîdetê fekî û fîzîkî înan rê kerdî. Polîsan rojnamegeran tehdîd kerdî k enêverdê rojnamegerî xeberan taqîb bikerê û rojnamegeran ware ra dûr vistî.
Dimayê ke nimajê binê ablûqayê polîsan de ame kerdiş, cenazeya Mehmet Sevînçî ver bi Goristanê Nene Hatûn ê Daricayî kewt rayîr. A mabêne de keyeyî lorna.
