Di 26’ê adarê de KCK’ê bi daxuyaniyekê ragihand ku dewleta tirk a dagirker dê bi hevkariya PDK’ê êrişek li ser başûrê Kurdistanê bide destpê kirin. KCK’ê bang li her kesê kiribû daku li dijî plana qirêj a PDK’ê û Tirkiyeyê rabin ser xwe.
Ev siyaseta şerxwaz ya PDK’ê di nav xelkê başûrê Kurdistanê de rastî nerazîbûnan tê. Rojnamevan Cîhad Hewramî derbarê êrişên dewleta tirk a dagirker de ji Rojnews re axivî. Cîhad got ku her cûre dagirkeriya ji aliyê hêz û aliyek ve li ser başûrê Kurdistan û Qendîlê were kirin, raste rast xizmeta welatên dagirker dike.
Rojnamevan Cîhad di dewamê de diyar kir ku partiyên başûrê Kurdistanê, her roj welatekî din ê dagirker tînin ser xaka Başûr û wiha pêde çû: “Hizbên Başûr hewl didin hemû destkeftiyên bidestketine, ji holê rakin. Heya nakokiya di navbera partiyan de ranebe, berjewendî hemû ne ji bo Kurdistanê bin, wê ev rewş xirabtir bibe. Ji ber ku ev hizb ji bo berjewendiyên siyasî, aborî û malbata xwe, diçin gel welatên dagirker.”
Aktivîst Yadîgar Rauf jî li ser heman mijarê nêrînên xwe anî ziman û wiha got: “Siyaseta dagirkeriya dewleta tirk ne tenê li Başûr heye, dixwaze serdestiya xwe li ser hemû herêmê bide ferzkirin. Dewleta tirk ji bo dagirkeriyê rewa bike, pişta xwe daye welatên cîhanê û aliyek siyasî ya li herêma Kurdistanê.”
