Menga Remezanî de herêma Serhedî ya Kurdîstanî de seba fitar û paşîvan bi destanê cinîyan keta, nanê tanûre, nanê tewqe pewjîyenê. Cinîyê Wan û Colemêrgî bi taybetî menga Remezanî, Newroze, veyve, şayîyan de yenê pêser û pîya keta, nanê tanûre û nanê patîle pewjenê.
Viraştişê nê berhemanê weşan zaf zehmet o zî. Cinîyî şefeqî ra wurzenê, serê tenûran de amadekarîya xo kenê. Tay cinîyî mîr elawenê, ê bînî kolîyan kirişnenê û tay cinîyê bînî zî adir wekenê.
Nê nanê tradîsyonelî yê kurdan bi hewteyan heta bi mengan kartî nêbenê.
Qezaya Tûşba ya Wanî ra Semra Uyar ard ziwan ke ê seba Remezanî û rojanê taybetan nê nanan pewjenê. Semra vat: ”Verî ma sey şayîyêke nan pewtêne. Sey verî nêbo zî no tradîsyon hema zî dewam keno. Ma bi gozan, rûnê keleyî, helaw yan zî sade nanê xo pewjenê. Ma nê nananê emrdergan Remezan de biwerê.”
Cinîyêka bîne Asîye Tekîn zî da zanayene ke ê her Remezanî de ketayan pewjenê û vat: ”Keta seba kurdan werdêko bêhempa yo. Bi taybetî seba keyeyanê qerebalixan ketayî zaf girîng ê; malzemeyanê xo ra semed nê nanî kartî nêbenê. Ma ge ge gozan, ge ge zî helaw û gozan kenê mîyanê nê nanan. No nan nanê ma yo neteweyî yo. Ma pîrik û dadîyanê xo ra viraştişê ci musayî û ma do bimusnê domananê xo.” WAN
