Dewleta tirk di 12’ê Nîsanê de di bin navê ‘Lêpirsîna Kobanê’ de li 13 bajaran endam û rêveberên HDP’ê kirin hedef, derbarê 91 kesan biryara destgîrkirinê da û bi dehan kes destgîr kir. Bi taybetî avahiya HDP’ê ya Cizîrê ji aliyê polîsan ve hate talankirin. Ev êriş li gelek bajaran hatin şermezarkirin.
Li Amedê li pêşiya Bîrdariya Mafên Mirovan a Parka Koşûyolûyê daxuyanî hate dayîn. Parlementerên HDP’ê Dêrsim Dag, Îmam Taşçier û hevserokên bajêr jî di nav de rêveberên DBP’ê jî tevlî daxuyaniyê bûn.
Di daxuyaniyê de destpêkê Hevserokê HDP’a Amedê Zeyyad Ceylan axivî û diyar kir ku ji sala 2015’an ve li dijî partiya wan bi hezaran operasyona hatine lidarxistin û ev tişt got: “Di van operasyonan de bi hezaran HDP’î hatin destgîrkirin û di heman demê de bi hezaran HDP’î jî hatin girtin. Armanca desthilata AKP-MHP’ê ew e ku HDP’ê bêbandor bikin û nehelin siyaseta demokratîk bi pêş bikeve. Civak kuştina xwe û aştiyê naxwaze. Êrîşên desthilatê ne ji xurtbûna wê ji qelsbûna wê ne. Çi dibe bila bibe AKP-MHP hatine ber asta qedandinê. Yên ku winda dike ew in û ya ku qezenç dike jî siyaseta HDP û sazî û dezgahên civaka demokratîk in.”
Piştî axaftina Zeyyad Ceylan, parlementer Dersim Dag jî axivî û “Lêpirsîna Kobanê” weke “kompas” pênase kir û wiha got: “Desthilat bi ‘Lêpirsina Kobanê’ dixwaze destkeftiyên gelê Kurd tune bike. Li Kobane DAIŞ’ê winda kir. Deshilata AKP’ê vê qebûl nake û ji ber vê yekê bi ser gelê Kurd te tê û dixwaze tola DAIŞ’ê ji Kurdan bigire. AKP-MHP bi van operasyonan dixwazin tekoşîna Kurdan îllegalîze bikin. Lê çawa ku DAIŞ winda kir wê AKP-MHP jî winda bikin.
Dê ev zihniyet têk here
HDP’a Rihayê jî li ber avahiya xwe daxuyanî da û zext şermezar kir. Parlamenterên HDP’ê yên Rihayê Ayşe Surucu, Omer Ocalan û gelek kes tevli daxuyaniyê bûn. Hevserokê HDP’a Rihayê Ziya Çalişkan anî ziman ku ji bo îktidara AKP-MHP’ê têkoşîna HDP’ê di çavê gelê Kurd de bide reşkirin, van zextan pêk tîne û dê ev zext bi ser nekevin. Parlamenter Omer Ocalan jî destnîşan kir ku wan gelek zext û tirsan ji ser xwe avêtine û wiha got: “Wê ev zîhniyeta çetekar têk here û em ê bi ser bikevin. Em meşru ne û divê ji îradeya gel re hurmet bê nîşandan.”
Dê têkoşîna wan bi ser bikeve
HDP’a Mêrdînê li ber avahiya xwe daxuyanî da û destgîrkirinên pêk hatin û zextên li ser avahiya HDP’a Cîzîrê şermezar kir. Gelek endam û rêveberên HDP’ê beşdarî daxuyaniyê bûn û pankarta “Em HDP’ê Diparêzin” vekirin. Hevseroka HDP’a Mêrdînê Perîhan Agaoglu diyar kir ku armanca êrişên AKP’ê û MHP’ê ew e ku HDP siyasetê neke û wiha got: “HDP rêya sêyemîn e. HDP fikr û ramanek e. HDP azadî ye. HDP hêviya gelan e. Hûn nikarin îradeya gel asteng bikin û em faşîzma desthilatdariyê şermezar dikin, Em hebûn, em hene û em ê her hebin.” Hevserokê HDP’a Mêrdînê Salih Kuday jî anî ziman ku wê gelê kurd li ber van zextan jî serî netewîne û ew ê têkoşîna wan bi ser bikeve.
HDP’a Navçeya Îskenderûnê jî li avahiya xwe zextên li ser partiya xwe şermezar kir. Hevserokê HDP’a Îskenderûnê Abdurrahîm Şahîn anî ziman ku ew ê li dijî her dozên dekûdolabê derkevin û têkoşîna xwe bidomînin. Şahîn xwest kesên hatine binçavkirin tavilê bên berdan.
HDP’a Mêrsînê jî li Parka Zarokên Azad daxuyanî da û nûnerên partiyên siyasî, sendîka, komele û gelek kes tevli daxuyaniyê bûn û pankarta “Zext nikarin me bêzar bikin” vekirin. Hevseroka HDP’a Mêrsînê Bedriye Kuş da zanîn ku ew ê li dijî zextan li ber xwe bidin û wê HDP bi ser bikeve.
