Serekîya Karanê Dîyanetî Camîyê Pîlî yê Sûrî yê Amedî de ”panoyê agahdakerdişî” daliqna. Pano ser de bi tirkî, îngilizkî, erebkî û rûskî agahîyî est ê la kurdkî çin a. Amedijan vera ney nêrazîbîyayîşê xo mojna û vat: “Wayîrê raştikênî yê nê welatî kurd ê.”
Tahsîn Severî pare kerd ke kurdkî ziwanê înan o û vat: “Erd, erdê ma yo. La çira ca nêdîyeno ziwanê ma? Ziwanê ma, ma rê qedexe kenê. Ma do seba ziwanê xo têkoşîn bikerê. No ca camîyê Homayî yo, çew nêeşkeno tede ziwanê kesêkî qij bivînê. Çîyo winasên Îslam de çin o.”
Hemwelatîyê bi nameyê Raîf Kartalî vat: “Hînî ê camîyan zî goreyê xo virazenê. La dîn de çîyo winasên çin o. Bi îznê Homayî rojêke kurdkî do azad biba.”
Huseyîn Tanişerî vat: “Nê welatî de pêro ziwanî serbest ê, la kurdkî qedexe ya. No Îslamîyet de çin o. Kesê ke binê nameyê Îslamîyetî de nîjadperestîye kenê, wa xo rê mevajê ‘misilman.’ Tirkîya goreyê xo Îslamîyetêk viraşto. Erdogan binê nameyê Îslamîyetî de merdiman anceno perrê xo. No ferasetê înan vernîye ra nata esto.”
Bedîuzzaman Ergunî vat: “Ma kurd ê, ma tim kurdkî qisey kerdêne. Ganî ziwanê ma nêro qedexekerdene. Ez mecbur nîya ke bi tirkî yan zî erebkî duayan bikerê.”
Îdrîs Kaparî vat: “Hemwelatîyê nê erdî kurd ê. Kurdî wayîrê nê şaristanî yê. Seba ke ma kurdkî qisey kenê, ma rê vanê ‘terorîst.’ Eke cayêk de edalet çin bo, tede her xirabî qewimîyena. Tek derdê hukmatî binpaykerdiş o.”
Bahattîn Topalî vat: “Tîya Amed o, tîya de her kes bi kurdkî qisey keno. Her ziwanî ra verî ganî tîya de tabelaya bi kurdkî bîyayêne. Ê binê nameyê dînî de merdiman xapînenê. Na dewlete nîjadperest a. Hînî na dewlete nêeşkena ma bixapîna.” AMED
