Tirkîya bi hetkarîya PDKyî 14ê Nîsane de hemverê Mintiqayê Federalî yê Kurdistanî de hêriş ard ca û 17ê Nîsane de zî hemverê wareyê Zap, Metîna û Avaşînî de hereketê verhîrayî ameyî destpêkerdiş. Hemverê Şengalî, Vakurî û Rojhelatê Sûrîyeyî de zî hêrişî dewam kenê.
Rojnamegêre Berîtan Sarya derheqê hêrişê AKPyî yê bi hetkarîya PDKyî ajansê Jinnewsî rê erjnayîş kerd.
‘Tirkîya wazena bikewo Garî û Qendîlî’
Saryaye dîyar kerd ke hemverê Wareyê Pawitişî yê Medya de hêrişêke xidar esto û seranserê serre hêrişî dewam kerdê, Tirkîya planê xo kerdê ciwîyayîşî û vat: “Tirkîya waşt hîrê mengî de bikewo Garî û Qendîlî û nê de israr kena. HPGyî derbeyê giranî dayî ci ro. Bedel da. Hinî mintiqan de operasyonî domnenê. 14ê Nîsane de hêrişî zêdeyêr bîy. 17ê Nîsane de hemverê Kurojahro, Şikeftêbirîndara, Çîyayê Reş û Avaşînî de hêrişî ameyî ca. HPGyî hêrişî verhîra kerdî. Şer bê mabên dewam keno.”
‘PDK hewl dano dormeyê HPGyî bigîro’
Saryaye bale ante serê hetkarîya TSK û PDKyî, eşkera kerd ke serrê vîyarteyî zî eynî tabloyî ameyê ciwîyayîş û vat: “Hêzê Zerevanî ke girêdaye yê PDKyî yê şawitê mintiqayê Şêladizî û hema uca de yê. Na reyî eskerê Tirkî ra ney, qerargehê yê Vaşurê Kurdistanî yê dewlete ya Tirkî ra şawitê mintiqayê Zapî. Dewlete ya Tirkî qerargehê eskerî yê Bamernî ra bi helîkopteran eskerî ardî xetê Şêladizî. Hetê dewlete ya Tirkî de rolê kordînekerdişê şerî kay kerd. Pêwa nînan HPGyî xoverdayîşêk pîl mojna ra. Ardişê eskeran ê qerargehê Tirkî yenê manayê ke PDK zî tewirê hereketê îşxalkerdişî bîyo. Wazenê HPGyî bikerê ablûqayî.”
‘Muhîmî ya xetê Kurojahro’
Saryaye dîyar kerd ke duştê hêrişan de xoverdayîşêk pîl esto û Tirkîya vindîbîyayîşê pîlî dayê û vat: “Avaşîn, Metîna û Zap perçeyê Iraqî yê û Zap û Avaşîn 40 serrî yo hetê HPGyî ra yeno xebetnayîş. Yeno hedefkerdiş ke uca de darbeyî bidê gerîllayî ro û bikewê Garî û Qendîlî. No hem seba Kurdan hem zî seba Iraqî muhîm o. Polîtîkayê qirkerdişî yê seserran ê dewlete ya Tirkî esta. Sîyasetê înkarî û îmhayî yo:Seba nê bîyarê ca qirkerdişê fizîkî û kulturî kerdî. La 50 serrî yo Hereketê Azadîya Kurdî duştê înan de yo û ê nêeşkabî qirkerdişî bîyarê ca. Dewlete ya Tirkî wazena bido PKKyî ro û Şarê Kurdî bê pawitiş verdo. Pêwa nê serewextê seserra Pêkerdişê Lozanî yena. Dewlete ya Tirkî planê Mîsakî Mîlî zanena, wazena heta Musûl û Kerkukî newe ra îşxal bikero. Hereketê îşxalkerdişî ana ca. Hemverê Wareyê Pawitişî yê Medyayî de operasyonî kerdêne la apey antêne. 2021î pey ra reyêke de hereketê îşxalkerdişî aver fînayî. Mintiqayê Kurojahroyî ke mintiqayê Zapî de yo xeylêk muhîm o. Rolêke muhîm kay keno. Rayîrê Garî, Metînayî, Zapî na mintiqa ra vîyarenê. Vera nê zî îşxalkerdişê xo bîyarê ca, do hemverê Garî û Qendîlî de zî hereket bîyarê ca.”
Saryaye eşkera kerd ke Tirkîya rewşa ke Garî îşxal bikero de, do Musûl bikero binê tehdayî û serê Kerkûkî ra zî xeylêk kayan kay bikero û no plan tesîr serê heme Mintiqayê Federalî yê Kurdistanî ra bigîro heta Vakur û Rojhelatê Sûrîyeyî û Iraqî dewam bikero û wina vat: “Di Teşrîna Verîne de referandûm bî, la dewleta Tirkî mudaxale kerd. Ameyê pawitiş ke YNK namzetê serokkomarîyî vejo. Pêwa mesajê înan ê îtîfaqê Kurdistanî bîbî ke wirdînan zî namzetê xo vetî. Wezîrê Karê Zerî yê nikayî Rayber Ahmed, endamêke yo verî yê pawitişî yo û merdimêke qilêrin o. Bi NATO û dewlete ya Tirkî dir namzetê serokkomarîyî ame ramojnayîş.”
‘Startê şerî giranbîyayîşê tecrîdî dir ame dayîş’
Saryaye sewbîna dewamîye de nê çîyî qal kerdî: “Dewlete ya Tirkî coka xo vindîkerdişî ra bixelesno û îqtîdarîya xo bidomno hêrişan hemverê Mintiqayê Federalî yê Kurdistanî de dewam kena. Vêşêrî HDPyî nizdîyîya partîyê Tirkîyayî xo ra yenê zanayîş. Seba qirkerdişê Kurdan temam bibo duştê hêrişan de bêvengî esta, kesêk vengê xo nêvejeno. La seke AKP plan keno, nêşino. HPG xoverdayîşêk pîl mojneno ra. La bêşik no qîm nêkeno. Tena hemverê mintiqayê HPGyî de hêrişî çinî yê. Tirkîya de dormeyêke faşîzmî yê cidî estê. HDP hedef de yo. Zîndanan de qirkerdişî yenê ca. Heme merdimê demokratîkî yenê tasfîyekerdiş. Hemverê Vakur û Rojhelatê Sûrîyeyî de hereketê îşxalkerdişî yenê kerdiş. Startê hêrişan zî bi tecrîdê giranî yê serê Rayber Ocalanî de ameyo destpêkerdiş. No serrêke zêdeyêrî yo Birêz Ocalanî ra malûmat nîno girewtiş. Bi amancê qirkerdişî hêrişêke topyekun esto.”
‘Duştê Kurdan ê’
Saryaye wina peynîyê qiseyanê xo ard: “PDK û Tirkîya hetkarîye de yê. PDK wextêke derg o hemverê PKKyî de hêrişan de yo. PDKyî di heme planê qirkerdişî yê hemverê Kurdan de ca girewto. Abdullah Ocalanî 2013î de waşt seba yewîyîya neteweyî kongreyî kom bikero. Rolê hemserekî dayî Mesût Berzanî, la hetê Mesût Berzanî ra ame redkerdiş. Nika rewşêke lezkî esta. Ma problemê bîyayîşî û çinîbîyayîşî ciwîyenê! Ganî ma di asasê menfeatê neteweyî de bêrê têhet! Nika welatê ma binê îşxalkerdişî de yo. Wazenê ma bifetesnê. Ganî Kurdî yewîyîya xo awan bikerê!” ANQARA
