Roniştişo 3. yê dewaya vera kiştoxê Denîz Poyraze, Onur Gencerî Mehkemeya Cezaya Girane ya Îzmîrî de ame kerdene. Pîya bi keyeyê Denîze Heyetê Rayberdişê Merkezî yê HDPyî, Meclîsê Partîye, endamê Koordînasyonê Cinîyan, temsîlkarê partîyan, wekîl, îdarekar û temsîlkarê rêxistinanê cinîyan û endamê partîyan dewa teqîb kerd.
Roniştişî ra verî Hetkarê Serekê Koma HDPyî Saruhan Oluç û temsîlkaranê Koordînasyonê Cinîyan verê edlîye de eşkerayîye daye. Oluçî vat: ”Ma roja verêne ra nata vanê ke no suîkast o û peyê ci de rêxistinêka cergan û dormeyo tarî est o. Kamî no qirkerdiş plan kerd? Heta nika heyetê mehkeme derheqê na babete de gamêke nêeşte û çîyêk nêkerd. Ez reyna Îzmîrî ra venga hukmatî dana ke ma do qetî sereyê xo nêarê war. No têkoşîn têkoşînê edalet, azadîye û têdûştî yo. Destê xo serê HDPyî ra bigêrê.”
Endama ‘Cinîyî Pîya Bihêz ê’ Zîlan Tanbogaye zî îfade kerd ke têkoşînê edaletî yê Poyraze têkoşînê her kesî yo. Tanbogaye da zanayane ke êyê ke Peymana Stenbolî fesh kerda, kiştoxê Poyraze yê. Meryem Yildirim û Mehtap Alîşane zî qirkerdiş şemezar kerd û waşt ke kiştoxî wa bêrê cezakerdene.
Kiştoxê Denîz Poyraze, Onur Gencer bi sîstemê SEGBÎSÎ tewrê roniştişî bi.
Serekê Baroyê Îzmîrî Ozkan Yucelî ke roniştiş de qisey kerd vat: ”Hedefê kiştişê yew kese nê heme kesê ke zere de yê do biameyênê kiştene. Kiştox nika remeno. Bi sîstemê SEGBÎSî tewrbîyayîşê şe raşt nîyo. O ganî tîya verê çimanê ma de cewabê persanê ma bido. Hema cipêrsayîşê ci zî nêqedîyayo.”
Avûkatanê dewa ra Turkan Aslan Agaçe zî vat: ”Ma pêro zanê ke no qirkerdiş hetê kesêkî ra nêbi. Ganî kam ke talîmat û her hetî ra paştî daya ci bêro safîkerdene. Eke mehmekeye şima zî sey dozgerê cipersayîşî têgêrane ma sere de vajê ke çîyo winayên nîno qebulkerdene. No hêriş vera demokrasî ame kerdene, coka her kes wazeno dewa teqîp bikero la şima waştişê ma yê heyata pîle red kerd nika şar nêrdîwane ser o nişeno ro. Mehkemeya şima persê ke hewce kenê kiştoxî ra nêpersayî. Vera banê HDPyî yew hêriş bi û kiştox vano ‘kam ke mi vera bikewo ez do bikeşî.’ No cîneyetêko sîyasî yo. La îdîaneme de no çîn o. Seba ke dozgerîye cipersayîşo xirab kerd, şert nîyo şima zî wina dewam bikerê. Ma eşnawit ke babî û waya kiştoxî şahîdîye ra ancîyayî. Şahîde ke bi talîmatî ameyî goştarîkerdene ganî tîya sey şikdarî î îfade bidê. Tekîlîya înan kiştoxî reyde est a, coka şahîdîya înan muhîm a. Kiştoxo tersonêk uca ra wuyeno. No senî muhakemekerdiş o.”
Serekê Baroyê Îzmîrî Ozkan Yucelî ke dima ra qale girewte û vat: ”Şima tîya roniştiş kerd sey kayî. Kiştox tîya nîyo, şahîdî tîya nînê goştarîkerdene. Wina muhakemekerdiş nêbeno. Ma wazenê semedê caardişê edelatî muhakemekerdişo raşt bêro kerdene. Mehkemeya şima wa peyser biancîyo. Şima bêhet tênêgerenê. Coka ma heyetê şima red kenê. Ma semedê nê welatî edalet wazenê. Ma wazenê wa hêzê ke peyê nê qirkerdişî de yê vejîyê werte. Şima bi qeraranê xo verê nê genê. Ma her yew endamê şima red kenê.”
Serekê mehkeme waştişê Yucelî red kerd. Dima ra kiştox Gencerî qisey kerd û waşt ke rîyê ”tehrîq”î ra cezaya ci bêro war. Avûkatanê dewa vera tewirê heyetê mehkeme nêrazîbîyayîş mojna û vat ”kiştox şima ra paşt geno coka çîyo winayên wazeno”. Seba ke kiştoxî HDPyîjan rê vat ”terorîst” heyata mehkeme vengê nêrazîbîyayîş bi berz. Wekîla HDPyî Gulîstan Kiliç Koçyigîte vat: ”Şiman nêeşkenê destûr bidê kiştoxî ke ma rê vajo ‘terorîst’. Ma sîyasetê demokratîkî kenê. Çew nêeşkeno ma rê wina qalan vajo.”
Hemsereka Pêroyî ya ÎHDyî Eren Kesîn zî ard ziwan ke kiştox hetê îqîtdarî ra yeno pawitene û vat: “Şima zî tehdît kerdî, vengê şima zî nêvejîya. Nê kiştoxî hukmê tirkî ra hêzdar ê. Ewro no reyna vejîya werte.”
Roniştişo bîn 18ê temmuze rê ame peyde eştene. ÎZMÎR
