Masaya Elewîyan a Komîsyonê Şaran û Bawerîyan ya Partîya Demokratîke ya Şaran (HDP) semedê nasdayîşê kampanyaya ”Elewîyan rê Heqê Hemwelatîya Seyyewbînî” kombîyayîşêk organîze kerd. Hemserekê Pêroyî yê HDPyî Mîthat Sancar tewrê kombîyayîşî bi.
Sancarî sere de bale ante polîtîkayanê asîmîlasyon û qirkerdişî yê îqtîdarî yê ke tarîxî ra vera kurdan û elewîyan yenê rayraberde ser û vat: ”Xora ma pêro zanê ke senî zaf problamê elewîyan est ê. Her warî de vera înan înkar yeno caardene. Wextê sereyê komare ra wina yo. Elewîyî tim raştê zextan û neheqîye yenê. Heta ka no problem nêro çareserkerdene haştîya komelkîye nêbena. Mifteyê problemî zî hemwelatîya seyyewbînî ya. Ma zî waştişanê elewîyan heqdar vînenî û paştî danê ci. HDP çirey vera çewî qal nêkeno. Tim pîya bi hetanê komelkîyan est o û têkoşînê înan pîya bi înan rayra beno. Ma tîya bi nameyê elewîyan qisey nêkenê. Ma pîya bi elewîyan qisey kenê. Senî ke me meseleya kurdî de zî bi nameyê kurdan nê, kurdan a pîya qisey kenê, wina.
Waştişê ma oyo ke sîtemêko heme hemwelatîyî tede seyyewbînî eşkenê biciwîyî, bêro înşakerdene. Coka ma vanê waştişê elewîyan ê heqê hemwelatîya seyyewbînî semedê cuye newî û destpêkerdişî rayîr mojneno ma. Ganî qirkerdişan dir bêro têrî. Heta ke heqîqet mevejîyo werte edalet nêbeno. Polîtîkya sedeqa ya îqtîdarî zî est a. Bi na polîtîka keno ke elewîyan bixapîno. Muxalefet zî vera elewîyan sey îqtîdarî polîtîkaya sedeqa rayra beno ke elewîyan kişta xo de tepişo. Ma sedeqa nê heq wazenê. Sey heme hemwelatîyan semedê kurdan û elewîyan ma heqê xo wazenê. Ma pê bawer ê ke do kedkar, kurdî, elewîyî û heme komel kayê ke serê înan de yenê kaykerdene ferq bikerê û bi têkoşînê hemparî verê ci bîgêrê.”
Badê qiseykerdişê Sancarî Parlementera Tulay Hatimogullariye derheqê broşurê ke ameyî amadekerdene û kampanya de zanayîşî da. DÊRSIM
