Hevserokatiya Koma Civakên Kurdistanê (KCK) bi minasebeta şehîdbûna jina şoreşger û têkoşer Aysel Dogan daxuyaniyeke nivîskî weşand.
Berfirehiya daxuyaniyê wiha ye:
“Rêhevala me ya bi nirx Aysel Dogan ku yek ji şoreşgerên destpêkê yên Têkoşîna Azadiya Kurdistanê ye, di encama nexweşiyeke de şehîd bû ku me ji kûrahiyê bandor kir. Em li ber bîranîna rêheval Aysel Dogan a ku hemû jiyana xwe ji bo Şoreşa Azadiya Kurdistanê feda kir û têkoşîna wê ya mezin da, bi rêzdarî bejna xwe ditewînin û soz didin ku têkoşîna wê ya ku bi hezkirinê birêve bir, em ê bi serketinê tacîdar bikin.
Rêheval Aysel Dogan şoreşgereke mezin bû ku hemû jiyana xwe da têkoşînê. Rêhevaleke ku ji bo azadî û rizgariya gelan, jinan û mirovahiyê her cure berdêl daye, li hemberî dijmin xwedî hêrseke mezin bû û bi kesayeta xwe ya têkoşer, berxwedêr û serhildêr ti carî serî li ber dagirkeriyê netewand. Di salên xwe yên dirêj ên girtîgehê de tu carî teslîmî zilm û îşkenceyê nebû. Weke rêhevala Sakîne Cansiz û şoreşgerên 14’ê Tîrmehê li hemberî dijminê qirker, mêtinger, faşîst îşkencekar li ber xwe da û teslîm nebû. Bi zanabûna xwe ya bilind, bi azweriya xwe ya azadiyê û bi dilsoziya xwe ya kûr a têkoşînê her tim bû rêhevaleke mînak. Her tim karî bibe rêhevalekî kedkar, bi enerjî, bê dudilî her cure erkê bi cih tîne, xwedî zanabûneke bilind a berpirsyariyê e û hezkirina wê ya gel kûr e.
Rêheval Aysel xwedî ruh û seknek pir bi israr bû. Zanabûn û hezkirina wê ya welat pir kûr bû. Pir girêdayî wê baweriyê bû ku mirov û civakbûn tenê bi welat û civakek azad pêkan e. Rizgariya Kurdistanê, gelê kurd û jinên kurd xeyal û hesreta wê ya herî mezin bû. Her tim ji bo vê xeyal û azweriyê jiya û heta ku şehîd bû ji bo vê têkoşiya.
Rêheval Aysel li beramber Rêber Apo xwedî dilsoziyeke kûr û qawîm bû. Ji bo Rêber Apo fêm bike û li gorî wê bijî her tim di nava lêgerîn û hewldanan de bû. Di sala 1999’an de li ser banga Rêber Apo bêyî dudilî tev li koma duyemîn a aştiyê bû û ji Ewropayê derbasî Tirkiyeyê bû. Tevî ku dizanibû ku wê ji aliyê dewleta tirk ve were girtin û biavêjin zindanan jî, lê dilsoziya xwe ya ji bo Rêber Apo û têkoşînê rêheval Aysel gihande vê sekna giranbûha. Bi vê yekê re pêşengiya pêvajoya nû ya ku Rêber Apo dixwest bide destpêkirin kir û di refên herî pêş de cih girt. Dewleta tirk a faşîst, mêtinger û qirker bi erênî nêzî vê pêngavê nebû û Aysel Dogan û rêhevalên wê girtin û avêtin girtîgehê. Rêheval Aysel bi naskirina vî karakterê dijmin ê nemerdane, di dema ku di zindanê de bû, bi kelecan piştgirî da hewldanên çareseriyê yên Rêber Apo û di nava hewldan û têkoşîneke mezin de bû. Rêber Apo her tim vê sekna hêja ya rêheval Aysel teqdîr kir, her tim baweriya xwe ya ji bo wê anî ziman, hêviyên xwe yên mezin ên ji wê anî ziman û ji hemû rêhevalan re weke mînak nîşan da.
Rêheval Aysel Dogan jî di pêşketina tevgera siyasî ya kurd de pêşeng kir û ji bo vê jî kedên mezin da. Di gelek qadên siyaseta demokratîk de xebitî. Rêheval Aysel ji bo zanabûna azadî û rêxistinbûnê ya gel kedeke girîng da. Dewlet her çiqasê bi zext, destgîrkirin û girtinan her tim hewl da siyaseta demokratîk asteng bike jî, lê li hemberî van hemûyan li ber xwe da û di pêşxistina siyaseta demokratîk de israr kir û di derketina vê kevneşopiyê de roleke girîng lîst. Di vê wateyê de qad û tevgera siyaseta demokratîk gelek deyndarê keda rêheval Aysel e. Lewma rêheval Aysel Dogan hem şehîda siyaseta demokratîk û hem jî ya Tevgera Azadiya Kurdistanê ye.
Rêheval Aysel Dogan ji malbata lîderê Terteleya Dêrsimê Pîr Seyît Riza bû. Dêrsim xwedî ruhekî azad û ya teslîm nabe ye. Akademiya ku ji bo derxistina zanabûnê ya qirkirin û qetlîamên dewleta tirk a dagirker û qirker li Dêrsimê û ji bo ji nû ve avakirina Dêrsimê li ser koka xwe, hat avakirin, birêve bir û xebatên girîng kirin. Desthilatdariya faşîst a ku nikarîbû tehemûlê van hewldanan bike, akademî girt û rêheval Aysel dîsa xist girtîgehê. Lê belê rêheval Aysel Dogan têkoşîna xwe di zindanê de domand. Bêguman ev ruhê berxwedanê berdewamiya sekna Seyît Riza, Besê û Zarîfeyan a ku serî dide lê serî li hemberî dijmin natewîne ye û yek ji kesên ku herî baş vê temsîl dike jî rêheval Aysel Dogan e.
Weke Tevgera Azadiya Kurdistanê em soza xwe dubare dikin ku weke pêwîstiya girêdaniya me ya bi bîranîna wê re, em ê têkoşîna azadiyê bigihînin serkeftinê. Rêheval Aysel Dogan di meha gulanê de ku pêşengên Tevgera Sosyalîst a Kurdistan û Tirkiyeyê di vê mehê de şehîd bûne, şehîd bû. Rêheval Aysel bû yek ji şehîdên mezin ên meha gulanê. Em di şexsê şehîdên meha gulanê de rêheval Aysel û hemû şehîdên şoreş û azadiyê bi rêzdarî, hezkirin û minetdarî bi bîr tînin û bang li gelê welatparêz ên Kurdistanê û hemû derdorên şoreşger ên demokratîk dikin ku xwedî li şehîdên azadî û şoreşê derkevin û têkoşînê mezin bikin.”
