Hemserekê Konseya Rayberdişî ya KCKyî Cemîl Bayikî Bernameyê Taybetî yê Stêrk TVyî de cewab da persan û rojdem ercna.
Beşê diyînî yê roportajê Bayikî ra tay noqtayî wina yê:
“Dewleta tirke û îqtîdarê AKP-MHPyî vera kurdan polîtîkaya qirkerdişî anê ca, şarî erzenê zîndanan, ziwanê kurdkî qedexe kenê, konseranê kurdan qedexe kenê. Vera nê hêrişan têna HDP têkoşînêkê demokratîkî keno û coka raştê hende hêriş û tedayan yeno. Dewlete vera HDPyî polîtîkaya eciqnayîşî kena. Tewr peyên dewlete konferansê HDPyî asteng kerd, înan zî teber de konferansê xo kerd. No tewirê înan raşt o, ganî nê tewirî rê dewam bikerê. Îqtîdarê AKP-MHPyî zaneno ke ho vînî keno hêrişê HDPyî keno. Dewlete bi dewaya qefilnayîşê HDPyî şovenîzmî kena. Ê seba ke qels ê hêrişê HDPyî kenê. Ganî şarê ma ney bivîno, hîna zaf sîyasetê demokrasî de ca bigêro û wayîrê HDPyî vejîyo. Ganî her kes verê polîtîkayanê serê HDPyî, Rayber Apoyî û şarê kurdî vindero.
Gerîlayî hê koyan de wezîfeyanê xo yê tarîxîyan anê ca. Ganî şar zî bi nê hawayî erkanê xo bîyaro ca. Ganî pêro welatperwerî destê înan ra çi yeno bikerê, hetê gerîlayan de ca bigêrê, çalakîyan bikerê. Ganî kurdî na dewlete rê xizmet mekerê, derbe bidê ci ro. Ganî kurdî Kurdîstan de rayîr medê fuhuş, madeyanê kundoxî, ajanîye, şewatê daristanan. Eke şarê ma wina bikero peynîya îqtîdarî do bîyaro.
Seba embazanê ma yê zîndanan û gerîlayan bi taybetî ganî cinî û ciwanî ekê xo yê serkêşîye bîyarê ca. Ganî şarê ma zî têkoşînê cinîyan xo rê esas bigêro. Ganî ciwanî tewrê gerîlayan bibê û her ca de erkanê xo bîyarê ca. Senî ke wextê hêrişanê vera Kobanê de serferberîye bibî nika zî ganî şarê ma her ca de seferber bibo. Çunke no proses prosesêko rojane nîyo. Dewleta tirke her hetî ra vera kurdan şer îlan kerdo. Ganî ciwanî yewbînan rêxistin bikerê û destê înan ra çi yeno vera dewlete wina şer bikerê. Ciwanî se bikerê meşrû yo. Çunke ma hê xo pawenê. Ciwanî wa seba nê şarî erkê xo yê tarîxîyî bîyarê ca û wayîrê şarê xo vejîyê.
Şerê Rûsya-Ukrayna ra dima Ewropa neçare ya ke hînî serê Rûsya ra nê serê Rojhelatê Mîyanênî ra gazî bigêra. Tirkîya zî no dî û fam kerd ke Ewropa hewceyê ci ya. Tirkîya seba ney zî înan ra waşt ke tasfîyeya PKKyî de wa destek bidê ci. Coka NATO pêro kerdişanê Tirkîya, hêrişanê ci yê kîmyewîyan, îşxalê ci peygoş keno. NATO û Ewropa wezîfe da ke PDK û Tirkîya ke wa gazî biresnê înan. Nika Ewropa wina propaganda kena ke ‘PKK ameyîşê gazî asteng keno, ganî ma PKKyî tasfîye bikerê.’ Çîyo winasên çin o. PKK qarişê gaz yan zî petrolî nêbeno.
Tirkîya seba ke tasfîyeya PKKyî de destek bidê înan Fînlandîya û Swêdî rê şantaj kena. Tirkîya vana ‘eke şima dişmenîya PKK û kurdan mekerê ma nêverdenê şima bibê endamê NATOyî.’ Wa verê şantajê Tirkîya de sereyê xo mearê war. Ez venga endamanê NATOyî zî dana ke wa kurdan û PKKyî rê dişmenîye mekerê û paştî medê Tirkîya.
Iraqî wextê hêrişanê vera Zapî de hêrişê Şingalî kerd. A roje Çarşema Sore est bîye. Aseno Iraqî waştişê Amerîka, dewleta tirke û PDKyî ser o hêrişê Şingalî kerd. Iraqî zî dî ke şerê vera Şingalî do zerar bido ci. Eke Iraqî hêrişan rê dewam bikerdêne pêro dinya o sey DAIŞî dîyêne. Êzidîyî Iraqî rê dişmenîye nêkenê. Têna wazenê bi nasnameyê xo tede biciwîyê û pê hêzanê xo bipawîyê. PDKyî wextê nê hêrişî de waşt Şingalî veng bikero û xo sey ‘hêzê caardişê aramîye’ bimojno. Iraqî no dî coka hêrişê xo qedînayî. Şarî zî xora Iraqî reyde pêvînayîş kerd. Iraq ganî verê hesasîyetanê êzidîyan de rêzdar bibo û waştişê êzidîyan qebul bikero. O çax meseleyî çareser benê.
Erdoganî verî multecîyê sûrîyeyîjî û cergê cîhadîstî şeran de û seba menfaatanê xo şuxilnayî, serê înan ra Ewropa ra zaf pere girewt û pê nê pereyî kurdî qetil kerdî. Nika zî Erdogan wazeno nê merdiman Rojawan de ca bikero, demografîya herême bivurno û reyna Ewropa ra pere bigêro. Erdogan kurdan cayê înan ra keno û herinda înan de cergan ca keno. Dewleta tirke senî ke Hatay îlhak kerdo armanc kena ke Rojawan zî wina îlhak bikera. Xora herêmanê îşxalkerdeyan de alaya tirkan, perwerdeyê bi tirkî, polîs û bankayê tirkan est ê. Ganî şarê Rojawanî nê kerdişan bivîno û goreyê ci têbigêro.
Peynî de ez gerîlayanê HPG û YJA-Starî selam kena ke bi çêrî Zap de şer kenê. Şima têna nîyê, pêro merdimîye ha hetê şima de ya. Şima pê îradeyêkê pîlî nê têkoşînî kenê. Şima mengêke ra zêde yo hê uca de yê. Şima do ser bikewê. Ez nê esasî ser o şima pêroyînan fîraz kena, selam kena.”
